Váldosiidu-Hovedsiden | Ođđasat | The BlackSheeps geasuhii

The BlackSheeps geasuhii

Fonta sturrodat: Decrease font Enlarge font
image The BlackSheeps joavku lea duođaid bivnnut. Lávvordaga vuolláičálle CD:id Girkonjárggas ja ollu olbmot ledje boahtán oastit sin CD-skearru.Mathis Hætta govven

Sullii 500 olbmo ledje boahtán musihkkagávpái Girkonjárgii oastin dihte The BlackSheeps ođđa CD. Joavku lea viehka bivnnut ain ja sii leat vuovdán badjel 30 000 CD Norggas ja dat lea hirbmat ollu ja jus beroštupmi bistá de vuvdet vel eanet.

Lávvordaga lei The BlackSheeps joavku boahtán Girkonjárgii signeret ja vuovdalit iežaset CD-skearru ja dan gal duođaštii joavku ahte sii leat maid bivnnuhat Nuorta-Finnmárkkus go sullii 500 olbmo ledje boahtán dán dáhpáhussii.
 Diimmu ovdal go joavku ollii musihkkagávpái ledje juo dat vuosttaš "fanssat" measta juo velledan vuordin dihte iežaset popnásttiid. Olmmošlohku lassánii čađat ja loahpas ledje čoahkkanan ollu olbmot. The BlackSheeps garraseamos "fanssat" leat dat nuoramusat ja dat boarráseamos olbmot, nu oidnui maid Girkonjárgas. Áddjá ja áddjut dege Áhkku ja áhkkut, dege váhnemat ja smávva mánát. Mu mielas lea imaš go nu unnán nuorra olbmo ledje boahtán, orru mu mielas nu ahte The BlackSheeps joavku ii geasut "teenager" buolvva ja dat lea goit mu mielas imaš. Go joavkkus han lea garra ja jođánis musihkka ja The BlackSheeps teavsttat han leat čállon nuorra olbmuin eará nuoraide. Sáhttá maid sivvan leat go joavku ii čuojahan maidege go sii dušše vuvde ja signereje CD:id Girkonjárgas mannan lávvordaga.

Bohte nu go popnásttit dahket
The BlackSheeps joavku bođii dego popnásttit ja sii ledje gárvodan maid nu go popnásttit ja sii geavahe maid "make up" ja das oidnui ja vuhttui ahte joavku ja sin biras smihttet čađat joavkku "image" birra. Dat lea buorre mearka ahte skearrofitnodat ja olles dat biras mii dál lea ovddideamen The BlackSheeps joavkku boahtte áiggi barget duođalaččat. The BlackSheeps lea juo dahkan musihkkahistorjá Norggas ja Davviriikkain maŋŋel go diibmá vuite MGP jr lávlagiin "Oro jaska beana". Dát lávlla han šattai "megahitan" juohke guovllus ja The BlackSheeps han vuittii maid Norgga Spellemánnibálkkašumi maid dáinna lávlagiin. Muhto dat lea historjá go joavku han lea sakka ovdánan ja dieđusge buorránan dan rájes.

Golle- ja
platinaskearru

Oanehis áiggis lea The BlackSheeps vuovdán  30 000 "BlackSheeps" nammasaš CD-skearru ja dat lea ollu. Joavku lea dán rádjái ožžon golleskearru ja dan oažžu go vuovdá 15 000 CD ja platinaskearru oažžu go vuovdá 30 000, ja nu ollu CD:id eai vuovdde galle artistta Norggas dál.  Joavku ii leat vel ožžon golle- ja platinaskearru ja dat lea imaš, muhto sii ožžot daid dieđusge juovllaide.
 – Mii eat dieđe goas mii oažžut daid, muhto dieđusge lea hui suohtas go mii de oažžut sihke golle- ja vel platinaskearru, dadjá The BlackSheeps Viktoria Eriksen, gii čuojaha rumbbuid ja son joatká: – Buot maid mii leat vásihan dan oanehis áiggis lea mannan nu jođánit ahte olmmoš ii báljo leat háhppehan jurdilit, muhto dieđusge dat lea somá ja jus galggan leat áibbas duođalaš de in lean gal rehkenastán ahte mii boahtit vuovdit ná ollu skearruid. Jurddaš, dat lea min vuosttaš skearru!

Guhkes boddu
The BlackSheeps joavkkuin lei váttis oažžut albma ságastallama Girkonjárggas go doppe ledje nu ollu olbmot ja lei maid hirbmat riedja.
 – Dat mii dál lea áibbas čielggas lea ahte mii leat váldán guhkit bottu ja mis eai šatta konsearttat ovdal go boahtte geasi. Dat leage maid buorre go dan botta han mii beassat čállit ođđa lávlagiid ja maid hárjehallat eanet, dadjá joavkku lávlu, Agnete Kristin Johnsen. Son ja dat eará "blacksheepsat" jotke signeremis CD:id go mun guđđen dan dilálašvuođa Girkonjárggas mannan lávvordaga.

   
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii