Beasai čiekčat Romssa A-joavkkus

Journalista

Guovtte geardde Brekke, Norbye ja dál Bær. Kárášjoga spábbačiekčit leat maŋemus moaddelot jagi dahkan bures Norgga alimusdási spábbačiekčamis, Romssa IL joavkkus. 

Kárášjoga gánda, Daniel Ailo Sakshaug Bær (17), oaččui iežas vuosttaš minuhtaid Romssa A-joavkkus go časke Fløya olggos Norgga cupa nuppi vuorus. Sakshaug Bær lea njealját Kárášjoga gánda guhte lávke šilju ala Romssa A-joavkku ovddas jagi 2000 rájes.

Leif Arne Brekke, Jan Egil Brekke ja Hans Norbye leat maid čiekčan Romssas maŋemus 24 jagis. 

Čiekčama boađus šattai 6-0 Romsii ja Sakshaug Bær lei šilju alde go golbma moala bohte. 

– Lei hirbmat somá go bessen debuteret A-joavkkus. Álggos go gullen ahte beasan mielde jovkui lei jo hui somá, muhto in jáhkkán dan ahte beasan šilju ala. Go ožžon dieđu ahte galggan sisa, de lei somá, dadjá Sakshaug Bær beaivvi maŋŋel čiekčama. 

Daniel Ailo Sakshaug Bær lonuhuvvui Yaw Paintsilain ja čievččai olgeš bealde suodjalusas (vingback) ja lohká dakko somán čiekčat vaikko lávii gaskašiljus čiekčat go lei Nordlysa čiekči. 

Fiskes koarta

Čieža minuhta maŋŋel go beasai šilju ala, 79. čiekčanminuhtas, oaččui nuorra spábbačiekči fiskes koartta, dego livččii hárjánan spábbačiekči guhte ollu lea čiekčan. Lei nu gohčoduvvon «professional foul». 

Ieš čaimmiha veaháš go Ávvir jearrá sus koartta birra. 

– Mii massiimet spáppa go leimmet falleheamen, Fløya oaččui máhcahanvejolašvuođa, muhto mun dollestin vai bissehan sin falleheami, čilge Sakshaug Bær. 

Iežas attáldagaid birra šiljus lohká nuorra čiekči ožžon rámi go lea duostil, viššal bargat ja sus lea leahttu go viehkala. Son iige bala mannamis duellaide. 

Eambbo čiekčanáigi

Romssa boahtte čiekčan lea ruovttušiljus Sarpsborg 08 vuostá, ovdal go vulget mátkkoštit cupa goalmmát vuoru čiekčat Oppsala dahje Vålerenga vuostá. 

Sakshaug Bær ii loga iežas gullan maidege eambbo čiekčanáiggi birra boahtteáiggis, muhto lohká iežas hárjehallan A-joavkku mielde maŋemus áiggiid. 

– In leat fásta Romssa A-joavkkus. Láven hárjehallat A-joavkku mielde jus dárbbašit čikčiid, muitala son. 

Ožžon rámi

Ovddeš Romssa čiekči, nubbi Kárášjoga gánda, Hans Julius Eriksen Norbye, lohká iežas gulahallan iežas ovddeš joavkoustibiin, ja Romssa kapteainnain Kent Are Antonseniin Sakshaug Bæra birra. 

– Jerren sus makkár lei, ja ožžon vástádusa ahte son bođii njuolga sisa, válddii ovddasvástádusa ja ordnestii fiskes koartta. Sus lea fápmu čiekčamis, ja dasa mii gal liikot, muitala Norbye. 

Norbyes leat ge alddis birrasiid 200 čiekčama Romssa A-joavkku ovddas ja rávve ge nuorra čiekči ain hukset iežas givrodaga ja buriid beliid. 

– Lea veaháš klisjé, muhto hárjehallat bures ja buoridit iežas čiekčama, dat lea vuohki mo šaddá buorebun ja oažžu eambbo čiekčanáiggi alit dásis. 

Norbye čievččai ieš olgeš bealde Romssa suodjalusas ja lei dovddus dan earenoamáš leavttu geažil mii sus lei šiljus. 

BIRRASII 200: Hans Norbye čievččai birrasii 200 čiekčama Romssa ovddas. Dát govva lea govvejuvvon 2017:s. Govva: Håkon Mosvold Larsen/NTB Scanpix
BIRRASII 200: Hans Norbye čievččai birrasii 200 čiekčama Romssa ovddas. Dát govva lea govvejuvvon 2017:s. Govva: Håkon Mosvold Larsen/NTB Scanpix

Ii ábut vuollánit

Go Norbye lei sullii seamma agis go Sakshaug Bær lea dál, de oaččui son maid iežas vuosttaš čiekčama Romssa A-joavkku ovddas. Maŋŋel vuosttaš čiekčama golihii moadde jagi ovdal go son fas beasai šilju ala Romssa ovddas. Dan bottas ollii vásihit ollu ja čohkkii maid buriid vásáhusaid eará joavkkuin. 

– Go lea nu nuorra go son lea dál, de ii galgga vuollánit dainna jus vel ii oaččo ge eambbo čiekčanáiggi dalán. Ferte bargat bures hárjehallamiin, ja go de oažžu vejolašvuođa. leaš dal hárjehallančiekčan dahje siskkáldasčiekčan, de ferte váldit daid vejolašvuođaid maid oažžu. Go lea nuorra čiekči, de lea lávki beassat čiekčat guhkit go jus lea hárjánan čiekči, muhto jus váldá vejolašvuođaid go dat bohtet, de oatnu lávki eambbo čiekčanáigái ja maid ođđa ja buoret kontrávttaide, čilge Norbye.  

Norbye finadii ieš Sálašvákki joavkkus (TUIL) guokte áigodaga ovdal go fas vižžui ruovttoluotta Romsii. 

– Jus livččen vuollánan, de illá jáhkán ahte mus livčče logi jagi Norgga alimus dásis, dadjá son. 

 Háliidivčče eambbo 

Go vuos beasai šilju ala, de lea dat movttiidahttán Sakshaug Bæra eambbo čiekčat ja ovdánit vel eambbo. Son muitala ahte livččii hui hállu beassat fásta čiekčin Romssa A-jovkui ja čiekčat eambbo alit dásis go dál čiekčá. 

– Čievččan Romssa B-joavkkus (4. divišuvnnas journ. meark.) ja livččii somá beassat čiekčat alit dásis, dadjá son. 

Norbye rávve su ahte ii galgga hohpohallat, muhto jus oažžu vejolašvuođaid, de soaitá gánnáhit daid dohppet. 

– Romssas lea fiinnis ja mun jáhkán ahte lea ovdamunni doppe čiekčat dál ovdalii go eará, alit dási joavkkuin nu go Bodø/Glimt ovdamearkka dihte. Romssas lea buorre taleantaovdáneapmi ja eará joavkkuin ges soaitá šaddat geahččalit rihpat muhtun riikkajoavkku dahje olgoriikka čiekčis saji, ii ge dat soaitte nu álki. Muhto jus oažžu vejolašvuođa mannat eará, alit dási jovkui láigočiekčin, de soaitá dat gánnáhit vai ovdána vel eambbo ja oažžu hárjáneami čiekčat alit dásis. Son lea dál dan agis ahte čiekčanáigi livččii dehálaš ovdáneami ektui, rávve Norbye. 

Ieš Sakshaug Bær ii oro jierásmuvvame: 

– Mun jáhkán maid ahte lean rievttes báikkis dál, muhto jus boahtá vejolašvuohta mii lea buoret iežan ovdáneapmái, de dieđusge ferten árvvoštallat dan. Ovddasguvlui áiggun ain garrasit hárjehallat, dadjá nuorra spábbačiekči.