Stáhta geaidnodoaimmahat álggaha asfáltabidjama 700 km riikageainnuin miehta riikka. 550 000 tonna asfálta galgá biddjot.
Dás lea árvu birrasiid 1100 miljovnna ruvnno ja leat 24 iešguđetge asfáltaentreprenevrra.
Barggut eai álgge oktanaga, dat leat gitta báikkálaš diliin, muhto lávejit álgit dábálaččat miessemánus. Muhtin guovlluin leat asfáltaentreprenevrrat jo álggahan bargguid.
Moadde jagi ovddos guvlui
Dasa lassin lea Stáhta geaidnodoaimmahat bidjan plána asfáltabidjama harrái golmma jahkái ovddos guvlui.
– Mii bargat dál 4-jahkásaš divodanplánain. Guhkesáiggi perspektiivvas dat addá midjiide vejolašvuođa oktiiheivehit iešguđetge doaibmabijuid ja árvvoštallat iešguđetge strategiijaid. Dát addá midjiide vejolašvuođa oaidnit olles geainnu, ii ge dušše asfáltabidjama. Vaikko oallugat oaivvildit ahte lea buorre go lea ođđa asfálta, muhto das lea unnán ávki jus ieš dat geaidnu asfáltta vuolde dárbbaša divodeami, lohká joavkojođiheaddji Stáhta geaidnodoaimmahagas Thor Asbjørn Lunaas preassadieđu bokte.
Asfáltaplánat boahtte jagiide leat vuos gaskaboddosaččat, dáid čađaheapmi lea stáhtabušeahta duohken ja hattiid dásis.
Galgá bistit guhkit
Maŋimuš jagiid lea dálkkádat- ja birasgáhttengáibádus leamašan oassin buot asfáltabidjanšiehtadusain. CO2-luoitima geahpideapmi deattuhuvvui šiehtadusain. Stáhta geaidnodoaimmahat lea geahpidan luoitimiid 30 proseanttain 2020 rájes. Mihttu lea geahpidit dán 70 proseanttain ovdal 2030.
Muhto asfálta bistevašvuohta šaddá oassin gáibádusain visot asfáltabidjanšiehtadusain boahtte jagiin.
– Mii leat muhtin pilohtašiehtadusain deattuhan asfáltta iešvuođa ja kvalitehta. Jus mii oažžut asfáltta mii bistá guhkit, dat lea positiiva sihke dálkkádaga, birrasa ja goluid ektui, lohká Lunaas.
Fuom, asfáltabarggut!
Dál go álgá asfáltabidjanáigodat, de lea luodda olu dievdduide ja nissoniidda bargosadji. Stáhta geaidnodoaimmahat ávžžuha danin buohkaid johtolagas smiehtastit sihke asfáltabargiid ja johtolaga láidesteaddjiid sihkarvuođa birra geat leat barggus.
– Juohke jagi vásihit dađibahábut váralaš diliid go mášohis biilavuoddjit vudjet meaddel váralaččat ja vudjet garrasit rusttetguovlluin. Mii bivdit buohkaid johtolagas váldit gulul ja vuhtiiváldit ahte olbmot barget geainnuid alde. Sii leat barggus min buohkaid dihtii, lohká Lunaas.
Stáhta geaidnodoaimmahagas muitalit asfáltabidjanbarggut čađahuvvojit ihkku go lea unnán trafihkka geainnu alde.
