Váldosiidu-Hovedsiden | Ođđasat | Eai luohte njuovahagaide

Eai luohte njuovahagaide

Fonta sturrodat: Decrease font Enlarge font
image Eanandoallodepartemeanta álggahii dutkama go boazodoallit eai luohttán njuovahagaide. Čájáhusgovva

Boazodoallit leat guhká várohan ahte njuovahagat verrošit biergokvalitehta sirremis. Danne gáibidii Norgga Boazosápmelaččaid Riikkasearvi ahte eiseválddit dutket MT Slakt ja Aage Pedersena njuovahagaid.

Golggotmánu loahpas ledje earret eará Nortura olbmot, Norgga Boazosápmelaččaid Riikkasearvvi ovddasteaddjit ja earát iskame bidjet go MT Slakt ja Aage Pedersen njuovahagat bierggu heajut klássaide go galget, ja dájuhit go sii nu boazodolliid.

Eai luohte njuovahahkii
Boazodoallit leat guhká juo vuorrástuvvan njuovahagaid bohccobiergokvalitehta sirremiin, ja boazoeaiggádat leat ballan ahte njuovahagat verrošit singuin. NBR jođiheaddji Nils Henrik Sara lohká sin danne gáibidan dán guorahallama Biebmo- ja Eanandoallodepartemeanttas.
 – Boazodoallit leat váidalan go sin bohccuin mákset dušše nuppi ja goalmmát klássa hatti. Jus sii leat jearran oastit fas seamma klássa bierggu, de ii gávdno šat dan klássas mihkkege, muhto dušše dat buoremus, divraseamos biergu 1. klássas. Danne leat šaddan oastit ruovttoluotta aivve divrasit haddái go vuvdet. Diet sáhka lea guhkit áigge jorran boazosámiid gaskkas. Danne fertiimet loahpas bivdit albma guorahallama go vihkumat šadde duohta giksin min miellahtuide, muitala NBR jođiheaddji Nils Henrik Sara.

Eai gávdnan boasttuvuođaid
Nortura, mii lea oastán bierggu njuovahagain, lea departemeantta ja NBR ovddas dutkagoahtán njuovahagaid guokte vahkku áigi juo. Sii lohket njuovahagaid sirret iešguđet klássaide čalbmemihtu mielde, eai ge dasa gávdno mašiinnat eai ge dihto njuolggadusat.

Raporta mas bohtosat boađáše ovdan, ii leat vel gárvvis. Muhto Nortura direktevra Hans Thorn Wittussen muitala ahte váldoboađus sin dutkamis čájeha ahte ii goabbáge njuovahat leat verrošan biergguid kvalitehta sirremis. Son duođašta ahte dát bargu čađahuvvui danne go ledje jorragoahtán nu ollu luovosságat njuovahagaid birra.
 – Mii háliideimmet dieđusge maid oažžut čielgasa das dájuhit go njuovahagat min geat oastit bierggu ja boazoeaiggádiid geat vuvdet. In sáhte vel muitalit eambbo go ahte váldoboađus čájeha ahte dás ii leat sáhka verrošeamis biergoklássaiguin, dadjá Hans Thorn Wittussen.

– Eat čiegat maidege
MT Slakt eaiggát Mikkel Triumf lohká váidalahttin jus boazodoallit eai luohte sutnje. Son imaštallá NBR ja departemeantta bargovuogi:
– Jus fal lea nu ahte golgoságaid vuođul leat álggahan dutkama, de gal lea oalle njárbadis ágga. Jus oktage sáhtášii baicca duođaštusaid buktit dasa ahte mun verrošan biergguiguin, de livččii eará ášši. Muhto midjiide ii daga gal maidege go dutket, ja sii ožžot eambbo vel dutkat jus háliidit. Nortura olbmot dadje dalle juo go ledje dáppe ahte buot lea ortnegis, ii ge mis leat mihkkege čiegadeamoš, dadjá Mikkel Triumf.


  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii