Searvadahttin- ja girjáivuođadirektoráhtta (SGD) lea ávžžuhan Norgga suohkaniid miessemánus ásaiduhttit oktiibuot 38 000 báhtareaddji dán jagi, dán rádjái suohkanat leat vuostái váldán 34 000 báhtareaddji. SGD vuordá ain vástádusa beali suohkaniin.
– Dat mearkkaša ahte mii eat leat áibbas olahan mihtu. Mii vuordit vástádusaid reasta suohkaniin. Mii ávžžuhit čuovvut min ávžžuhusa. SGD bagadallá ja doarju suohkaniid dan barggus, dadjá SGD konstituerejuvvon direktevra Lisbeth Fransplass Røren preassadieđu bokte.
SGD einnostusa mielde, jus treanda joatkašuvvá, de Norga ásaiduhttá 37 000 báhtareaddji dán jagi. Báhtareddjiid ásaiduhttimii oažžu juohke suohkan 50 000 ruvnno olbmo nammii lassin jus suohkan ásaiduhttá eanet olbmuid go lea almmuhan álggos SGD:i.
– Norga ain vuostai váldá hui olu báhtareddjiid Ukrainas mii lea soađis. Mun lean ilus dasa go suohkanat háhket ođđa ruovttuid, ja čájehit solidaritehta ja dáhtu. Ráđđehus geahččalii bidjat johtui doaibmabijuid mat dorjoše suohkaniid ásaiduhttin- ja searvadahttinbargguin. Mun sávan dan váikkuhit dasa ahte eanet suohkanat vuostái válddáše báhtareddjiid. Lea dehálaš lihkostuvvat báhtareddjiid vuostái váldimiin nu olu go vejolaš, lohká bargo- ja servadáhttinministtar Marte Mjøs Persen (Bargiidbellodat).
– Muhtin suohkanat dieđihit ahte lea hástaleaddji háhkat doarvái orrunsajiid ja suohkanbálvalusaid nu go dearvvašvuođa, skuvlla ja mánáidgárddi. Seammás mii oaidnit hirpmástuhtti áŋgiruššama gávdnat buriid čovdosiid hástaleaddji dilis. Suohkanat ain ásaiduhttet alla leavttuin. UDI lea dieđihan garra lassáneami boahtimis Norgii maŋimuš beivviid. Dat joatkašuvvá čakčat, loahpaha SGD konstituerejuvvon direktevra Røren.
