IMDi lea ávžžuhan Norgga suohkaniid ásaiduhttit oktiibuot 38 000 báhtareaddji dán jagi, 3000 eanet go álgoávžžuhusas lei, mii sáddejuvvui skábman diibmá.
Searvadahttin- ja girjáivuođadirektoráhtta (IMDi) dieđiha ahte dán jagi lea dárbu ásaiduhttit eambbo go dan 35 000 báhtareaddji maid álggos doivo. Dál lea ávžžuhus suohkaniidda ásaiduhttit oktiibuot 38 000 báhtareaddji.
Dat leat 7000 eanet go sajit mat leat jo mearriduvvon suohkaniin.
– Norgga gielddat, smávvát ja stuorrát, davvin ja lulde, bidjet olu searaid ásaiduhttit ja searvadahttit báhtareddjiid Norggas. Seamma olu searat gáibiduvvojit boahtteáiggis, dadjá IMDi konstituerejuvvon direktevra Lisbeth Fransplass Røren preassadieđu bokte.
Dárbbut ásaiduhttit eanet báhtareddjiid leat lassánan das rájes go IMDi almmuhii loguid 2022 čavčča.
– Dilli sáhttá rievdat jagi mielde. Loahppadárbbut ásaiduhttimii 2023:s sáhttet leat badjelis dahje vuollelis go mii dál diehtit, lohká IMDi direktevra.
IMDi juohká ássandárbbuid ovttasráđiid Suohkaniid guovddášlihtuin (Kommunenes sentralforbund – KS) ja maŋŋá fylkasuohkana neavvuma.
Suohkanat galgget vástidit IMDi:i maŋimusta borgemánu 31. beaivvi.
