Guokte almmáiolbmo ja guokte nissonolbmo dušše johtolagas jagi vuosttaš mánus. Earret spiehkastatjagiid koronapandemiijaáiggi, de eai leat ná unnán olbmot duššan johtolagas ođđajagemánus.
Buot dát njealjis geat dušše ođđajagemánus, dušše lihkohisvuođain main biillat beaškkehedje oktii. Dan čájehit Stáhta geaidnodoaimmahaga gaskaboddosaš lihkohisvuođalogut. Lihkohisvuođat dáhpáhuvve Oslos, Trøndelágas, Møre ja Romsdalas ja Romssas.
Lihkohisvuođat go biila boahtá ovddal
– Lea buorre go eai leat nu alla logut, vaikko juohke olmmoš gii duššá lea okta menddo olu. Leat buorit logut čavčča lihkohisvuođaloguid ektui. Lea vuorjašuhtti go buot ođđajagemánu jápminlihkohisvuođat dáhpáhuvve go biila boahtá ovddal, dadjá Stáhta geaidnodoaimmahaga johtolatsihkarvuođa jođiheaddji Guro Ranes preassadieđáhusas, iige ane amasin ahte dálvesiivu sáhttá leat sivva.
Ođđajagemánus leamaš molsašuddi dálki ja hástaleaddji vuodjinsiivu miehtá riikka, mii gáibida ahte biilavuoddjit leat áicilat ja gierdevaččat.
– Mii fertet heivehit iežamet leavttu ja vuodjima siivui ja dás fertejit buohkat váldit ovddasvástádusa. Mii Stáhta geaidnodoaimmahagas geahččalat áimmahuššat ahte geainnuin lea buorre siivu ja ahte leat nu sihkkarat go vejolaččat, lohká Ranes.
Maŋimuš jagiid johtolagas duššan olbmuid lohku lea lassánan. Gaskaboddosaš logut čájehit diibmá, 2023:s, dušše oktiibuot 115 olbmo. 2022:s dušše 116 olbmo.
– Vaikko badjel 100 olbmo leat duššan johtolagas jahkái guokte maŋimuš jagi, de čájeha ahte lea vejolaš geahpedit johtolagas duššan olbmuid logu. Erenoamážit biilavuoddjin fertet mii áddet makkár ovddasvástádus mis lea go mii vuodjit, deattuha Ranes.
