-Almmuhus-
OĐĐASAT– Nissonlaš guolá­steaddji ii galgga áito­juvvot sohka­beali dihte

– Nissonlaš guolá­steaddji ii galgga áito­juvvot sohka­beali dihte

-

-

Sandra Andersen Eira illosa go ráđđehus oaidná dásseárvováttisvuođaid guolástusealáhusas ja bidjet strategiijaplána buoredit nissonlaš guolásteddjiid dili: – Guolástusvirggis leat doarvái hástalusat nu mo leat.

Gaskavahkku, ođđajagemánu 13. beaivvi, lei guolástus- ja mearrabiebmoministtar, Odd-Emil Ingebrigsten, bovden nissonlaš guolásteddjiid digitála cealkámuščoahkkimii. Ráđđehus háliida cealkámušaid oažžut strategiijaplánii vai buoridit dásseárvvu guolástusealáhusas. Guolásteaddji ja sámediggeáirras, Sandra Andersen Eira, lei okta sis gii searvvai čoahkkimii ja sus ledje čielga cealkámušat Stuorradiggái. 

– Lean hui ilus go dásseárvostrategiijaplánabargu lea biddjon johtui, go dat lea dárbbašlaš. Nissonolmmoš ii galgga dárbbašit dovdat áitojuvvon dahje fuonášuvvot sohkabeali dihte, gal guolástusvirggis leat doarvái hástalusat nu mo leat, muitala Sandra Andersen Eira.

Golbma kategoriija

Son celkkii Stuorradiggái cealkámuščoahkkimis ahte strategiijaplána galggašii juhkkot golmma kategoriijai; loaktin, vuoigatvuođat ja rekrutteren. Ieš lea maid vásihan vealaheami iige hálit gierdevašvuođa vealáheapmái.

– Vuosttažettiin lea dehálaš loaktit bargobirrasis, ja de eai galgga nissonlaš guolásteaddjit vásihit seksuála vealáheami, ja mii fertet rievdadit negatiivvalaš guottuid nissoniid vuostá. Sohkabeliin galgá reála vejolašvuohta lihkostuvvat. Nubbi lea fas vuoigatvuođaid ektui. Nissonlaš guolásteddjiin galget vuoigatvuođat ja galget ovttastahttit bearašeallima bargguin, eaige dovdat ahte lea boastut ealáhusas bargat. Ii oktage dievdoolmmoš oaččo almmolaš etáhtain dakkár ultimatuma. Maŋimuš kategoriija lea fas rekrutteren, mii gal guoská guktot sohkabeallái. Eiseválddit fertejit heivehit nu ahte ođđa ja nuorra guolásteddjiide galgá álki beassat virgái, muitala Sandra Andersen Eira.

Unnán nissonat guolástusvirggis

Preassadieđáhusas ealáhus- ja guolástusdepartemeanttas čuožžu ahte loahpageahčen 2020 ledje, Guolástusdirektoráhta loguid mielde, 360 nissonolbmo ja 9144 dievdoolbmo geain lei guolásteapmi váldoealáhussan, ja 67 nissonolbmos ja 1409 dievdoolbmos fas liigeealáhussan.

Guolástus- ja mearrabiebmoministtar Odd-Emil Ingebrigsten. Preassagovva: Ealáhus- ja guolástusdepartemeanta / Nærings- og fiskeridepartementet
Guolástus- ja mearrabiebmoministtar Odd-Emil Ingebrigsten. Preassagovva: Ealáhus- ja guolástusdepartemeanta / Nærings- og fiskeridepartementet

– Guolástusealáhusas leat menddo unnán nissonolbmot. Danne illudan oažžut cealkámušaid mo dainna sáhttit bargat, sis geat dovdet dili buoremusat, dadjá guolástus- ja mearrabiebmoministtar, Odd-Emil Ingebrigsten, preassadieđáhusas. 

Dasa lea Sandra Andersen Eira ovttaoaivilis:

– Lea duohta ahte leat unnán nissonlaš guolásteaddjit, ja mu lagasbirrasis lean áidna nissonolmmoš dan ealáhusas. Stuorradikkis oidnet dásseárvováttisvuođa ja sávvet cealkámušaid dán áššái. Dál lea vuosttaš lávki váldon. Mun ferten rámidit guolástusministara ja ráđđehusa go leat álggahan dakkár barggu, dadjá Sandra Andersen Eira.

– Olu man ferte láhčit

– Mun in oaivvil ahte galget 50/50 nissonolbmo ja dievdoolbmo guolástusvirggis, muhto baicce beroštan das ahte sii geat háliidit bargat virggis galget oažžut buori vejolašvuođaid dasa. Lea váttis guktot sohkabeallái álgit dan virgái ja dasa lea olu man ferte láhčit. Earret eará ekonomalaččat, nu go doarjagiid vuosttašgeardefatnasiidda. Duohtavuohta lea ahte lea divrras virgi, čilge guolásteaddji.

Sávvá ahte Stuorradiggi ovttasbargá Sámedikkin

Andersen Eira sávvá ahte Stuorradiggi sáhttá oahppat Sámedikkis. Son oaivvilda ahte Sámediggi lea leamaš buorre instánsa guolástusealáhussii. 

– Lihkus lea mis Sámedikkis sihke presideanta ja ráđđelahttu geat leaba oalle diđolaččat dásseárvvu birra, ja mu mielas lea Sámedikkis dásseárvostrategiijaplána juohke suorggis, leaš dal guolástus dahje boazodoallu. Mun sávan ahte dainna bargguin sáhttá Stuorradiggi ovttasbargat Sámedikkiin, go mis lea olu oahpahit nubbi nubbái, muitala Andersen Eira.

-Almmuhus-