Ráđđehus almmuha 2 miljovnna kruvnna juolludeami gielddaide mat háliidit láhčit nuoraide gaskal 12 ja 25 jagi mávssolaš guolástanvásáhusaid.
– Guolásteapmi lea váikkuhan hirbmat olu sihke olbmuide ja báikegottiide miehtá rittu. Movttiidahttit nuoraid searvat guolásteapmái, ii váikkut dušše sin boahtteáigái, muhto maiddái guolástusealáhusa ceavzilvuhtii ja bistevašvuhtii, lohká ealáhus- ja guolástusministtar Cecilie Myrseth preassadieđáhusas.
Son ávžžuha gielddaid miehtá riikka ohcat gitta 200 000 kruvnna doarjjajuolludeami duohtan dahkat nuoraidguolástanprošeavttaid 2024 geasi. Oktiibuot lea doarjja 2 miljovnna kruvnna ja buot gielddat sáhttet ohcat doarjaga. Ohcanáigemearri lea guovvamánu 28. beaivi. Ohcansiidu.
242 nuora ožžo diibmá 2023:s geassebarggu
Oktiibuot ožžo 242 nuora geat ásse 17 gielddas geassebarggu golahussuorggis gielddalaš prošeavttaid bokte. Nuoraid lohku lassánii beliin 2022 ektui go dalle ožžo 112 nuora geat ásse čieža gielddas geassebarggu.
– Lea movttiidahtti oaidnit gielddaid diimmá bargobohtosa. Raporttat muitalit nuorat leat hirbmat duhtavaččat. Mun sávan dát vásáhusat movttiidahttet eanet nuoraid válljet bargoeallima guolástussuorggis, lohká Myrseth.
