Norgalaččat borret uhcit ja uhcit guoli ja mearraelliid jagis jahkái olu jagiid, erenoamážit mánáid ja nuoraid gaskkas. Dál juolluduvvo borramušdoalloprográmmii Fiskesprell 3,9 miljovnna kruvnna eanet lasihan dihtii borramušávnnasdoarjaga skuvllaide ja mánáidgárddiide.
Fiskesprell lea riikaviidosaš borramušdoalloprográmma man ulbmil lea oažžut mánáid ja nuoraid eanet borrat guliid ja mearraborramuša. Ulbmil lea movttiidahttit rávisolbmuid oahpahit mánáide ja nuoraide málestit dakkár borramuša.
– Eanet mánát ja nuorat berrešedje oahppat njálgga guolle- ja mearraealliborramuša birra Norggas. Čájehuvvo ahte mánáid- ja nuoraid lohku geat borret dakkár borramuša lea njiedjan. Mii fertet sihkkarastit ahte mearas vižžon borramuš lea olámuttus. Mii diehtit ahte guolle- ja mearraelliid haddi hehtte skuvllaid ja mánáidgárddiid geavahit daid borramušávdnasiid. Danin juolludat liigeruđa, oktiibuot 3,9 miljovnna kruvnna, Fiskesprell borramušdoalloprográmmii, nannen dihtii skuvllaid ja mánáidgárddiid vejolašvuođa háhkat mearasvižžon borramušávdnasiid, lohká guolástus- ja áhpeministtar Cecilie Myrseth.
Norgalaččat borret uhcit guoli
Norga ii leat goassege ovdal olgoriikii fievrridan nu olu mearraborramuša go dál. Olgoriikii vuovdin lassánii 14 proseanttain ovddit jagi, 2022, ektui, mii maid lei olahusjahki. Muhto guolle- ja mearraelliid borriid lohku Norggas lea dássidit njiedjan olu jagiid. Jagi 2015 rájes lea lohku njiedjan 13 proseanttain.
– Guolli ja mearraborramuš lea Norgga nubbin stuorámus gálvu mii vuvdo olgoriikii. Eat goassege leat nu unnán guoli borran dáppe Norggas. Ráđđehusa mielas galggašii lohku lassánit. Mearraborramuš lea ceavzilis ja dearvvašlaš borramuš, danin fertet mii borragoahtit eanet dakkár borramuša. Váre eanet mánát ja nuorat borašivčče álbmás ja buori guoli ja mearraborramuša Fiskesprell-prográmma bokte, lohká Myrseth.
