Mannan jagi leat eambbosat go goassege ovdal háliidan vuodjingoartta.
Koronaáiggis leat oallugat garván kollektiivajohtolaga. Nu leat de eambbosat go goassege ovdal váldán vuodjingoartta Stáhta Geaidnodoaimmahagas. Leat nu oallugat ahte dán geasi ii leat buohkain vejolašvuohta vuodjit mohtorsihkkelgoartta.
– Lea hui čielggas ahte pandemiija geažil lea oallugiin, erenoamážit gávpogiin, miella váldit vuodjingoartta, dadjá Henning Harsem Stáhta Geaidnodoaimmahagas.
Ođđajagimánus gitta miessemánnui dán jagi leat 60 011 geahččaleami vuddjon, ja diibmá lei dát lohku 53 200. Sensorat leat dábálaš bargoáiggiid lassin bargan sihke lávvordagaid ja eahkediid. Ovddeš sensorat leat maid váldán oasi barggus vai eanebut besset vuodjit, muhto liikká eai leat leamaš doarvái.
– Lea dađibahábut guhkes vuordináigi olles geasi ja gitta čakčii. Muhtin oassi ferte vuordit boahtte áigodahkii ovdal besset vuodjit, dadjá Harsem preassadieđáhusas.
