Čakčamánu 15. beaivvi rájes lea fas lobi dolastallat meahcis. – Olbmot leat eambbo dolastallan pandemiija áigodagas, dieđiha Norsk Friluftsliv.
Dollavára dihtii lea oppalaš dolastallangielddus cuoŋománu 15. beaivvis gitta čakčamánu 15. beaivái.
– Korona-áigodagas leat olusat deaivvadišgoahtán dollagáttis. Erenoamážit nuoraid gaskkas lea beroštupmi lassánan ii ge oro nohkamin ge, čállá Norsk Friluftsliv váldočálli Bente Lier preassadieđáhusas.
Ipsos-iskkadeamis lohká okta njealji gaskal 15- ja 24-jahkásaš olbmos ahte sii leat cahkehan dola dávjjit korona-áigodagas. Daid olbmuid searvvis leat 80 proseantta muitalan sii jotket dolastallamiin maŋŋá pandemiija.
Dolastallan jierpmi
Vaikko oppalaš dolastallangielddus lea fámuhuhtton, de lea viiddiduvvon gielddus muhtin gielddain gos lea unnán arván. Váldočálli Bente Lier deattuha ahte lea ain dehálaš jurdilit heive go, ovdal go cahkkeha dola.
– Fertet álo dárkkistit heive go cahkkehit dola dan báikkis. Dárkkis dálkki ja biekka ja jáddat dola albma láhkai ovdal go guođát báikki. Gielddat sáhttet gieldit dolastallama jus dan guovllus lea vuovdebuollinvára go ii leat arván guhkes áigái, maiddái čakčat ja dálvit, lohká váldočálli Bente Lier.
Ovdal go cahkkeha dola, de berre leat čáhci dahje eará ávnnas lahka mainna sáhttá jáddadit dola.
Dolastallanrávvagat
* Ovdal go cahkkehat dola, dárkkis lea go meahccebuollinvára.
* Dolastallis, gii berre leat rávisolmmoš ,lea ovddasvástádus fuolahit buollinsihkarvuođa.
* Fuolahit ahte ii cahkket dola lahka viesuid ja šattuid.
* Ii leat lohpi dolastallat lássá alde.
* Ii leat lohpi boaldit plastihka, viessohuksenávdnasiid ja eará doabbariid.
* Dolla galgá áibbas jáddaduvvon ovdal go guođát báikki. (Galdu: DSB)
