– Lea issoras jus mu pacemaker fáhkka ii doaimma, lohká Hulda Bjørg Ludviksdottir. Son vuvddii elbiilla go fuomášii biilla bagadallangirjjis pacemaker-váruhusa.
Biilabuvttadeaddji Mitsubishi váruha čálalaččat kundariid geain lea pacemaker, mii lea elektrovnnalaš ráhkkanus mii veahkeha váimmu julkit nu mo galgá. Badjel 20.000 norgalaččain lea dákkár «váibmobáhtter»:
– Ládden sáhttá váikkuhit rusttegiid. Allet geavat jođánis láddema, váruha Mitsubishi ja čilge «elektromagnehtalaš bárut sáhttet váikkuhit doibmii», čállá Mitsubishi i-MiEV el-biilla bagadallangirjjis ja ávžžuha dárkkistit buot elektronmedisiinnalaš buktagiid.
Mitsubishi dáhttu sin geain lea pacemaker leat várrugasat go láddejit el-biilla. Dábálaš láddemis berrejit bures garvit láddema el-čuggestaga, johtasa ja láddenkássa. Jođánis láddema eai berrešii bidjat johtui, čállá NAF (Norgga Automobiilla searvi) preassadieđáhusas.
Ballái
Hulda Bjørg Ludviksdottir lei aiddobeliid oastán el-biilla go fuomášii dán váruhusa, golbma beaivvi maŋŋil . Son muitala sus leamaš guokte jagi pacemaker rattis ja lea hui várrugas.
– Girjjis han čuožžu ahte mis geas lea pacemaker eat galgga lahkonaddat jođánis láddára. Dan ii muitalan biilavuovdi go osten biilla. Lea issoras jus pacemaker fáhkka heaitá doaibmamis, lohká Hulda Bjørg Ludviksdottir ja muitala son vuvddii dalán el-biilla.
LHL (váibmo- ja geahppabuhcciid riikkasearvi) gulahallan hoavda Martin Steen ii lean gullan ovdal ahte olbmuide geain lea pacemaker lea várálaš láddet el-biilla. Steen lohká jus leš nu ahte el-biilla ládden sáhttá váikkuhit olbmo pacemakerii, de berrejit dearvvašvuođa eiseválddit guorahallat ášši, vai sáhttá garvit unohas váikkuhusaid.
