Gonagas Harald čuohpaduvvo odne ja oažžu bissovaš pacemakera, dieđiha Šloahtta.
– Majestehta Gonagas oažžu odne bissovaš pacemakera. Čuohpadeapmi čađahuvvo Rikshospitálas odne ovdalgaskabeaivvi. Dan maŋŋá galgá Gonagas leat muhtin beivviid buohcciviesus, čállá Šloahtta preassadieđáhusas.
Gonagas buohccái infekšuvnnain guovvamánu 27. beaivvi go lei luomus Malaysias ja fertii buohccivissui doppe. Son oaččui gaskaboddosaš pacemakera dan botta go lei doppe.
Son bođii ruoktot girdiin njukčamánu vuosttaš vahkkoloahpa ja sisačálihuvvui Rikshospitálii Osloi. Gonagas lea buohccidieđihuvvon guokte vahku.
Maŋŋel sisačáliheami bođii diehtu ahte Gonagasas lea beare vuollegis váibmofrekveansa ja dárbbaša bissovaš pacemakera.
