Vaikko ledje giellaváttisvuođat, de válljejedje sisafárrejeaddjit lohkat ođđasiid norgalaš mediain go háliidedje diehtit mo koronadilli lea.
Dan čájeha kvalitatiiva dutkan maid Rambøll lea ráhkadan Mediabearráigeahču, Máhttodepartemeantta, Kulturdepartemeantta ja searvadahttin- ja máŋggabealatdirektoráhta ovddas.
– Studia čájeha ahte sisafárrejeaddjiin lea stuorra luohttámuš ásahuvvon norgalaš redaktevrrastivrejuvvon mediaide main lea kritihkalaš lahkoneapmi ođasgálduide, lohká mediabearráigeahču direktevra Mari Velsand preassadieđáhusas.
Norgalaš mediat eanemus geavahuvvon
Sisafárrejeaddjit leat eanemus geavahan norgalaš redaktevrrastivrrejuvvon mediaid go leat háliidan dieđuid njoammuma birra ja muđui gozihit doaibmabijuid neahtas. Sii leat válljen geavahit norgalaš mediaid vaikko ledje giellaváttisvuođat. Sis lei stuorra luohttámuš norgalaš mediai. Velsand lohká ahte dáidde olbmuide leamaš norgalaš mediat ja almmolaš neahttasiiddut dehálamos ođasgáldot koronaáigodagas.
– Olusat ohcaledje álkit giela. Lea čielga hástalus sihke almmolaš dearvvašvuođa eiseválddiide ja mediaide ahte dan ferte váldit duođas. Lea hirbmat dehálaš ahte olbmot áddejit giela, erenoamážit go lea sáhka heakkas ja dearvvašvuođas, joatká Velsand.
Uhcán olgoriikka áššit medias
Sisafárrejeaddjit ohcaledje eambbo olgoriikka ođđasiid medias, go sin mielas čálle mediat menddo olu mii dáhpáhuvvá Norggas ja lagas birrasis. Eanaš sisafárrejeaddjit geavahedje sosiála mediaid gulahallat iežaset olbmuiguin, bearrašiin ja ustibiiguin, ja diehttelasat oažžut ođđasiid iežaset ruovtturiikkain. Eanetlohku sisafárrejeaddjiin dihte makkár mediat ledje luohtehahtti dahje eai. Velsand mielas lea buorre go sisafárrejeaddjit nu dahket
