Suoma ráđđehus dieđihii odne ahte čavgejit rádjedárkkisteami máŋgga riikii nugo Norgii ja máŋgga eará riikii. Muhto rahpet maid ráji nugo Ruoŧa ássiide rádjeguovlluin.
Ássiide geat orrot Suoma riikkarájiid lahkosis rádjeguovlluin šaddá dál álkibut rasttildit ráji Supmii, cealká Suoma ráđđehus. Dat guoská sihke Ruoŧa ja Norgga rádjeguovlluide.
Rádji gaskkal Suoma ja Ruoŧa lea leamaš gitta koronadávdda dihte, dušše bargoolbmot leat beassan ráji rasttildit – muhto dál besset buot Ruoŧa ássit geat orrot Haparanda, Badje-Durdnosa, Girona ja Bájila gielddain maid Supmii. Haparanda gielddaságadoalli dajai kommentáras SVT Nyheterii ahte dát leat buorit ođđasat.
– Dat lea lávki rivttes guvlui ja lávki dábálaš árgabeaivái. Ja dat lea positiiva sáhka, mii sávvat ahte Suopma fargga rahpá olles Norrbottena letnii, dadjá Sven Tornberg, Haparanda gielddaságadoalli.
Muhto ii leat vel čielggas makkár duođaštusbáhpirat dárbbašuvvojit vai olbmot rádjeguovlluin galget sáhttit rasttildit ráji Supmii.
Suoma ráđđehus dieđihii preassakonferánssas ahte sii maid čavgejit rádjedárkkistemiid riikkaide nugo Dánmárkui, Islándii, Duiskii, Hellasii ja Maltai.
Dát mearrádus guoská borgemánu 24. beaivvi rájes.
(©NTB)
