Dutkit leat geahččan koronadieđuid 3,9 miljovnna norgalaččas. Riska oažžut liigevigiid koronas jus buohccá lea 36 proseantta unnit boahkohuvvon olbmuin.
Oslo universitehta (UiO) dutkit leat viežžan dieđuid Norgga dearvvašvuođaregistaris áigodagas 2018 – 2021 2 364 651 olbmos geat leat ožžon boahkuid ja 1 532 935 olbmos geat eai leat ožžon boahkuid. Sii juhkkojuvvojedje njealji jovkui, agi ja dan mielde gulle go sii riskajoavkkuide.
Buot joavkkuin čájehuvvo ahte go lea ožžon boahkuid, de dat geahpeda riskka oažžut covid-19 maŋŋásaš vigiid mealgat, ja oktiibuot geahpeda riskka 36 proseanttain.
– Mii sáhttit duođaštit man dehálaš lea boahkuheapmi maiddái covid-19 maŋit vigiid eastadeapmái. Mii duođaštit maiddái min ovddeš riikkaidgaskasaš gávdnosiid, muitala Farmaseutainstituhta professor Hedvig Nordeng NTB:i. (©NTB)
