Guovdageainnus njoammu sihke vuoiŋŋahatvuolši ja golgodávda, danin ávžžuha suohkanváldodoavttir olbmuid bassat gieđaid ja bissut ruovttus jus lea buohcci.
Guovdageainnu suohkanváldodoavttir Anne Lajla Kalstad dieđiha suohkana ruovttusiiddus ahte oallugat buhcet čoavjebákčasiin dahje golgodávddaid.
Norovirus lea dábáleamos golgodávda ja leavvá jođánit. Dat njoammu álkit olbmos olbmui doppe gos oallugat čoahkkanit dahje orrot čoahkis. Olbmot buot ahkejoavkkuin sáhttet buohccát. Dábálaččat ii leat nu garra dávda ja manná badjel sullii 1-3 beaivvis jus muđui lea dearvvaš.
– Buorre giehtabuhtisvuohta sáibbuin ja čáziin sáhttá eastadit njoammuma. Dat suddje maid ahte earáide ii njoamo virus. Giehtaspriita ii doaimma nu bures norovirusa vuostá. Danne ii berre atnit giehtaspriitta, muhto bassat baicce gieđaid sáibbuin ja čáziin, ávžžuha Kalstad.
Go dearvvasmuvvá golgodávddain, de sáhttá fas vuolgit skuvlii dahje bargui. Mánáidgárdemánát, olbmot geat barget biepmuin ja dearvvašvuođabargit gal ávžžuhuvvojit bissut ruovttus 48 diimmu dan rájes go vuovssadii dahje luhčii maŋimuš.
Influeansa ja covid-19
Golgodávdda lassin leavvá maiddái dábálaš influeansa ja covid-19 Guovdageainnus. Olbmot ávžžuhuvvojit bissut ruovttus jus álget dovdat ođđa vuoiŋŋahatdávdamearkkaid.
– Buohkat, leaš dal buohcci dahje dearvvaš, berrejit maid doalahit buori giehta- ja gossanhygiena. Olbmot geain lea stuorát riska duođalaččat buohccát sáhttet árvvoštallat atnit njálbmesuoji go lea váttis doalahit gaskka áigodagaid go lea olu njoammun servvodagas, čállá Kalstad.
Guovdageainnu suohkanváldodoavttir ávžžuha maid oasi álbmogis bijahit boahkuid.
– Lea vejolaš boahkuhit sihke influeanssa ja covid-19 vuostá, ja earenoamážit leat muhtun olmmošjoavkkut ávžžuhuvvon boahkuid váldit. Gulat go ovtta daid joavkkuide mat leat ávžžuhuvvon boahkuid váldit? It go leat váldán boahkuid? De sáhtát váldit oktavuođa doavttirkantuvrrain dahje dearvvašvuođaguovddážiin oažžut eanet dieđuid.
