Norgga girku bajimus demokráhtalaš orgána, Girkočoahkkin, válljii bearjadaga 64-jahkásačča Harald Hegstad Girkoráđi jođiheaddjin.
– Mun lea giitevaš luohttámuša ovddas, ja illudan jođihit Girkoráđi barggu boahtte njeallje jagi, lohká Hegstad preassadieđu bokte.
Jahkásaš Girkočoahkkin lágiduvvui Troanddimis dán háve, ja dasa serve 117 miellahtu. Earet eará riikka 11 bismagodderáđi lahtut, Sámi girkoráđi jođiheaddji, Norgga girku nuoraidlávdegotti jođiheaddji ja bismačoahkkima preses.
Girkoráđi jođiheaddji válggas leigga guovttis, Harald Hegstad ja Gard Sandaker-Nielsen. Maŋŋel jienasteami ja jienaid lohkama, de čielggai ahte Hegstad vuittii válgga. Son oaččui 60 jiena ja nubbi evttohas ges 55 jiena.
Harald Hegstad lea riegádan 1959:s, ja lea válljejuvvon Nominašuvdnalávdegoddelisttu bokte Oslos. Son váldá Girkoráđi jođiheaddjebarggu Kristin Gunleiksrud Raauma maŋŋá, guhte lea jođihan Girkoráđi 2016 rájes.
