Sámediggeráđđi lea juolludan 300 000 ruvnno Norgga Girkui lágidit sámi konfirmántaleairra dán jagi sámi konfirmánttaide.
Sámediggi lea máŋga jagi juolludan doarjaga sámi konfirmánttaleirii. Ovddit jagiid lea konfirmántaleaira leamaš daid sámi konfirmánttaid várás geain ii leat sámegiella dahje sámi sisdoallu dábálaš konfirmašuvdnaoahpus. 2023 rájes lea dát rievdan nu ahte leaira lea buot sámi konfirmánttaide, beroškeahttá lea go sis sámegiella ja sámi sisdoallu dábálaš konfirmašuvdnaoahpus vai ii.
Leairra ulbmil lea čohkket juohke sámegiela guovllu nuoraid. Sis geain lea sámegiella ruovttugiellan besset giellaarena bokte oahppat ođđa doahpagiid, tearpmaid ja sániid, muhto maid gullat ja oahpásnuvvat eará sámegielaide. Sii geat eai máhte sámegiela nu bures besset gullat ja praktiseret sámegiela.
Norgga Girku lágidii guovvamánu 16. – 19. beivviid konfirmánttaleairra dán jagi sámi konfirmánttaide. Dán jagi leat ollu sámi konfirmánttat mii lea mielddisbuktán ahte ii lean vejolaš čohkket buot nuoraid seamma sadjái. Norgga Girku lea šaddan juohkit konfirmánttaid guovtti jovkui. Nubbi joavku deaivvadii Tømmerneset báikkis olggobealde Orjješ-Ráissa ja nubbi joavku Sjunkhatten báikkis Bådådjo olggobealde.
– Sámediggi oaidná dehálažžan ahte nuorat besset čoahkkanit giellaarenaide. Dán giellaarenas besset sihke ovddidit ja maid hárjánit sámástit. Giellaarenas lea maid vejolaš oahpásnuvvat eará sámegielaide. Sámi nuoraide lea maid dehálaš oažžut oskkuoahpahusa iežaset váibmogillii, dadjá sámediggeráđđi Mikkel Eskil Mikkelsen (NSR).
Ruhtajuolludeapmi lea Giellaovddidandoaimmaid doarjjaortnega bokte.
