Stáhta geaidnodoaimmahat lea dárkkistan lossabiillaid johtolaga Mátta-Várjjagis maŋimuš beivviid. Dušše ovttas lei menddo lossa guorbmi ja oaččui 16 850 kruvdnosaš sáhku.
Tor Wikan Stáhta geaidnodoaimmahat olgodárkkisteami davvi B ossodagas, muitala preassadieđáhusas ahte sii leat geassemánu 27.–30. beaivvi dárkkistan lossa mohtorfievrruid Mátta-Várjjaga gielddas.
– Muitet maiddái goallosvovnna juvllaide molsut geasserieggáid. Mii bisseheimmet vuojána mas lei goallosvovdna mas vuoddji lei vajáldahttán molsut geasserieggáide. Sáhkku duhát kruvnna. Kirkonjárgga johtolatstašuvnnas leat mii dán áigodaga dárkkistan deattu ja eatnašat leat čeahpit sirdit guorpmi iežaset vuojániidda. Dušše guoktásis lei badjelmeare guorbmi ja fertiiga divustit guorpmi vuojánis, muhto eaba sáhkkohallan. Dušše okta gálvobiillas oktan vovnnain lei 5300 kilo eambbo deaddu guorpmis ja oaččui 16 850 kruvdnosaš sáhku, muitala Tor Wikan Stáhta geaidnodoaimmahat utekontroll nord B ossodagas.
Muđui váiddii Stáhta geaidnodoaimmat vuoddji geas váillui duođaštus ahte lei doarvái vuoiŋŋastan. Vuodjingildosat: Persovdnabiila oktan ássanvovnnain mas váillui liigespeajal, vuoddji geas ii lean ámmátvuoddji gelbbolašvuohta, golbma vuojána main guorpmi fertejedje sirdit eret, guorbmebiila mii lei menddo govdat. Dasa lassin ožžo gávccis teknihkalaš váilli lihpu.
Muđui bissehedje guokte juvlalástára mas ledje pállagáffalat. Nuppi pállagáffalis lei doaresruovdi biddjon amas earáid vahágahttit.
– Dat vuoddji lea mielde lasiheamen johtolatsihkkarvuođa. Dat lea min miela mielde, rábmo Tor Wikan Stáhta geaidnodoaimmahaga olgodárkkisteami davvi B ossodagas.
