Maŋimuš jagi leat Rovdatai sáddejuvvon 244 boraspire mat leat goddon bivddus, vuojáhallan dahje jápmán iešguđet sivaid dihtii. Eanaš boraspiret leat goddon earre- dahje liseansabivddus.
Leat eallit mat leat goddon bivddu oktavuođas, vuojáhallan dahje jápmán lunddolaš sivaid dihtii. Rovdata laboratorias Troanddimis isket buot boraspiriid, nu go albasiid, getkkiid, gumppiid ja guovžžaid, čállá Rovdata.
218 goddon bivddus
Oktiibuot lea Rovdata váldán vuostá ja iskan 244 jápmán boraspire geassemánu 7. beaivvi 2021 rájes gitta geassemánu 3. beaivvi 2022 rádjái. Ledje 88 albasa, 37 gumppe ja 12 guovžža.
– Eanaš boraspiret leat goddon earre- ja liseansabivddus, muhto muhtumat leat maid goddon go leat vahágahttán eará elliid. Geatkelogus leat maid mielde dat geatkkit mat leat goddon biejus, lohká Rovdata bajitinšenevra Frode Holmstrøm.
Dasa lassin ledje 11 boraspire vuojáhallan, čieža jápmán amas sivaid geažil ja čieža lobiheamet goddon. Muhtin albbas lei sakka guoiran saŋášdávdda geažil ja goddui humaniteara sivaid geažil.
Jus lea sáhka politiijaáššiin, nu go lobihis goddimis, dahje jus navdet juoidá lobihisvuođa geavvan, de dutká Šibitdoavttirinstituhta dan jápmá ealli gávdnan dihtii jápminsiva. Rovdata oažžu das maŋŋá iskosiid go dat leat dutkojuvvon gárvvisin.
– Boraspiriin maid mii leat iskan, leamaš buorre dearvvašvuohta ja leamaš buori vuoimmis, muhto iskamat eai čájet makkárge spiehkastemiid, lohká Holmstrøm. .
Vuđolaččat dutkojuvvon
Go boraspiret jovdet Rovdata laboratoriai, de registrerejuvvojit dan NINA boraspirevuorkái. Dieđihuvvon jápminsivva dárkkistuvvo, earret eará deaddu, guhkodat ja vuoimmis registrerejuvvo. Váldet eret ja isket vuolledábiid, vuossa ja mannerávssáid njiŋŋelasain ja bálluid rávjjáin. Oaiveskálžžu ja bániid geavahit mearridit man boaris lei ealli. Dasa lassin váldet iskosiid dehkiin, vuoivasis, manimuččain ja čoavjjis, dárkkistan dihtii maid ealli lea borran maŋimuš jándora ja sihkkarastit ávdnasiid boahtteáiggi birasmirkoiskosiidda.
– Iskamat muitalit olu boraspiriid birra. Jus ealli lea goddon earre- ja liseansabivddus, de sáddejuvvo bivdái sierra diehtu mas oažžu dieđu man boaris dat lei, makkár vuoimmis ja man nállái dat lei. Muđui lea vejolaš ohcat rovbase.no geavahit dan rovbasanummara, čilge Holmstrøm.
Čalanat muitalit boraspire agi
Rovdata siiddus gávdná boraspire agi go lohká čalana jahkerieggáid. Maŋimus jagi iskosiid ahki: 0 jagi: 65 ealli 1-4 jagi: 154 ealli 5-9 jagi: 21 ealli 10 ja ja boarrásat: 4 ealli
Muhtin njiŋŋelas geatkki, mii báhččui Holtålen gielddas diimmá skábmamanus, lei 16 jagi boaris, dettii 11 kilo ja lei dábálaš vuoimmis. Dat govvejuvvui elliidkámerain ja beana guorai dan báikái gos goddojuvvui. Vuosi iskan čájehii ahte das leamaš čivggat maŋimus jagi.
Boarrásamos albbas mii bođii Rovdatai, lei goddon earrebivddus Stjørdalas, lei njiŋŋalas mii dettii 15,8 kilo, 11 jagi boaris ja dábálaš vuoimmis. Vuosi ja mannerávssát čájehedje ahte das ledje čivggat 2021:s. Okta daid čivggain báhččui oktan dainna etniin. Boarrásamos gumpeciiku goddui Aurskog-Høland guovvamánus 2022:s. Dat dettii 34 kilo, lei buorre vuoimmis ja vuosseiskosat čájehedje ahte das leamaš čivggat mannan jagi. Boarrásamos guovža báhččui Mátta-Várjjagis mannan geasi. Dát varris guovža dettii 139 kilo ja lei čieža jagi boaris.
