Jus beassážiid vuohtát geatkeluottaid ja gávnnat geatkebaikkaid, de váldde áinnas oasi baikkas mielde buhtes plastihkkapusiin ja fievrrit iskosa báikkálaš Stáhta Luonddubearráigehččui (SNO), ávžžuha Rovdata.
Máŋggas geavahit beassážiid vánddardit mehciid, ja nu lea stuorát vejolašvuohta vuohttit stuora boraspiriid luottaid. Rovdata sávvá ahte tuvraolbmot beassážiid áigge leat mielde geatkki DNA-goziheamis dan bokte ahte buktet geatkebaikkaid ja guolggaid báikkálaš luonddubearráigehččui.
– Mii analyseret DNA čoggojuvvon baika- ja guolgaiskosiin, ja bohtosiid geavahit náliid registreremii ja goziheapmái Norggas, seammás go ii dárbbaš leat oktavuohta elliiguin, muitala Rovdata jođiheaddji Jonas Kindberg.
Biologalaš iskosat geatkkis čohkkejuvvojit juohke jagi miehtá riikka ođđajagemánu 1. beaivvis gitta geassemánu 1. beaivái.
