Nu olu geatkki DNA-iskosiid go dán jagi leat čoaggán ja analyseren, eai leat goassege ovdal dahkan, eai ge leat nu olu getkkiid duođaštan goassege. Maŋimuš golbma jagi leamaš geatkenálli hui stáđis.
Juovlamánu 18. beaivvi almmuhii Rovdata geatkenáli jahkásaš DNA-vákšunbarggu Norggas, Ruoŧas ja Davvi-Suomas. Vákšunáigodagas, 01.01.-01.06., čogge ja analyserejedje oktiibuot 4375 DNA-iskosa geatkeguovlluin, mii lea ođđa olahus geatkevákšumis. Norggas čogge 35 proseantta eanet DNA-iskosiid go jagi 2022:s.
13 proseantta lassáneapmi diimmá rájes
Dan 3251 iskosis ledje 836 geatkki Norggas, Ruoŧas ja Suomas 2023:s, mii lea 13 proseantta lassáneapmi diimmá rájes. Getkkiid lohku lea lassánan sihke Norggas ja Ruoŧas. Norggas rehkenaste jagi 2022 juovlamánu ahte lea 366-403 geatkki, jagi 2021 ledje 371-408 geatkki.
– Geatkenállelohku leamaš hui dássit maŋimuš golmma jagis. Jagi 2023 olu duođaštuvvon geatkkit ii mearkkaš ahte getkkiid lohku lea lassánan, muhto dušše ahte dál lea stuorát oassi getkkiin duođaštuvvon DNA-iskosiid bokte, lohká Rovdata jođiheaddji Jonas Kindberg preassadieđáhusas.
Dán jagi ledje 64 geatkečivgama
Čoaggit DNA-iskosiid geatkebaikkas, -guolggain, -guččas ja -oaččis lea dehálaš vuohki go vákšu getkkiid Norggas ja Ruoŧas. Norggas duođaštuvvui juohke geatki viđa iskosis iešguđet boraspireguovlluin.
– Buot guovttejahkásaš dahje boarrásat getkkiin Norggas, de ledje 90 proseantta dovddus árabuš vákšumis. Dat čájeha ahte DNA-iskosa vákšun addá buori dieđu man galle geatkki leat riikkas, lohká Rovdata jođiheaddji Kindberg.
Norggas registrerejit maid geatkebiejuid ja čivgamiid geatkelogu registreremis. Dán jagi ledje 64 geatkečivgama ja rehkenaste leat 353 rávis geatkki ovdal čivgama mii lei mealgat eanet go diibmá.
