Badjel bealli olbmuin Romssas ja Finnmárkkus leat ovttaoaivilis, olbmot juhket beare ollu go leat mánáiguin ovttas ođđabeairuohta.
Ođđabeairuohta sáhttá leat hui erenoamáš ollu bearrašiidda, go mánát besset gohcit guhkit ja nu oidnet maid eambbo feasttaid gos juhket alkohola.
Av-og-til organisašuvnna váldočálli Ragnhild Kaski lohká preassadieđáhusas ahte ollu mánáide sáhttá ođđabeairuohtta šaddat unohassan, go sihke ođđabeairakeahtat ja gárrenolbmot ridjet. Son bivdá váhnemiid leat várrogasat, ja muittuha ahte mánát eai sáhte dušše guođđit feastta go leat ožžon doarvái.
– Dat mii ollesolbmo mielas orru hávski ja buorre, sáhttá dovdot dorvvoheapmin mánáide. Ii dárbbaš leat olu alkohola ovdal go rávisolmmoš rievdá, dadjá son.
Mánát ieža vástidan
Guorahallan man Ipsos lea čađahan Av-og-til organisašuvnna ovddas čájeha ahte 53 proseanta jerron olbmuin Romssas ja Finnmárkkus oaivvildit ahte olbmot juhket beare ollu mánáid oainnu ođđabeairuohta.
– Mii ávžžuhit buohkaid leat dihtomielalaččat das gokko lea rádji. Go mánáin jerro, de eatnasat vástidit ahte nulla, okta dahje eanemusat guokte láse alkohola lea dohkálaš, ja min mielas dat čájeha bures maid sii oaivvildit, dadjá Kaski.
– Bija meriid ovdal feastta
Iskkadeamit maid čájehit ahte eanet go juohke goalmmát olmmoš Romssas ja Finnmárkkus lea oaidnán gárren rávisolbmuid ovttas mánáiguin ođđabeairuohta.
Danin Kaski ávžžuha olbmuid ságastallat dán birra ovdal doaluid.
– Fertet duostat dadjat jus olbmot juhket beare olu mánáid ovddabealde. Muhto buot buoremus lea ahte hupmá dán birra ovdagihtii ja šiehtada mii lea riekta ja mii ii leat riekta alkohola oktavuođas.
