Dá leat áššedovdiid ráđit ahte maid sáhtát dáhkat jus oainnát gárrenolbmuid mánáiguin geassit.
Romssas ja Finnmárkku dadjet 38 proseantta ahte leat oaidnán gárihuvvan ollesolbmuid mánáiguin geasseluomus dán maŋimuš guovtti jagis, čájeha Ipsos iskkadeapmi mii lea dahkkon Av-og-til alkovettorganisašuvnna bealis.
Av-og-til gulahallanjođiheaddji, Eli Stavlund, hástala olbmuid bargat juoidá jus oidnet gárihuvvan ollesolbmuid geain lea ovddasvástádus mánáide geasseluomus. Maiddái dilis gos olmmoš ii dovdda máná iige váhnemiid.
– Berret geahččalit oažžut oktavuođa mánáin ja jearrat movt sus lea. Jus ii leat lunddolaš mánáin hállat, de sáhttá leat jierpmálaš váldit oktavuođa eará ovddasvástideddjiiguin, nugo boradanbáikki dahje hotealla bargiin ovdamearkka dihte. Muital maid leat oaidnán ja jeara sáhttet go dahkat maidege, ávžžuha Stavlund preassadieđáhusas.
Stavlund deattuha ahte lea dehálaš bidjat máná dárbbuid iežas unohasvuođa ovdalii.
– Lea unohas seaguhit dákkár áššiide, muhto mánnái sáhttá mearkkašit buot ahte olggobealolmmoš reagere. Jus dovddat máná váhnemiid de berret geahččalit siivvožit hállat suinna. Jus lea čielggas ahte lea gárihuvvan, de lea buoret vuordit nuppi beaivái ja baicce suddjet máná nu bures go sáhttá. Leage nu konkrehta go vejolaš, muital maid leat oaidnán ja manin du mielas lea váttisvuohtan, dadjá son.
Dán sáhtát dáhkat jus oainnát mánáid gárrenolbmo searvvis:
– Jus lea lunddolaš, de berret váldit oktavuođa mánáin ja čájehit ahte oainnát mii dáhpáhuvvá.
– Geahččal siivvožit hállat váhnemiin dahje eará ollesolbmuiguin, muhtumin sáhttá buoret vuordit dassá sii leat čielgan. Muital maid oainnát ja maid jurddašat.
– Hála eará ollesolbmuiguin. Oidnet go sii dan seamma go don? Maid sáhttibehtet ovttas bargat gieđahallat dili?
– Muital eará olbmuide geat leat máná lagasbirrasis beaivválaččat, ovdamearkkadihte oahpaheaddjit dahje dearvvašvuođabuohccedivššár.
– Ale mahkaluša váldit oktavuođa Mánáid ja Nuoraid Alárbmatelefovnnain jus dárbbašat hállat jurdagiid birra.
(©NTB)
