27 proseantta norgalaččain leat alko-organisašuvnna Av-og-til guorahallama mielde árvvoštallan heaitit mánnui juhkamis alkohola.
– Mii leat ilus go oaidnit ahte nu ollugat leat árvvoštallan mánu váldit bottu juhkamis. Vilges mánus leat ollu buorit váikkuhusat, earenoamážit maŋŋel juovlamánu, goas dat sáhttá šaddat veaháš ollu, dadjá Av-og-til prošeavtta váldočálli Ragnhild Kaski preassadieđáhusas.
Iskkadeamis, man Ipsos čađahii Av-og-til ovddas, leat 2668 olbmo vástidan ahte leat go sii goassege maŋemus guovtti jagis árvvoštallan váldit vilges mánu.
Eanemusat leat Oslos ja Vestfoldas ja Telemárkkus, gos 32 proseantta vástidit ahte sii leat árvvoštallan heaitit juhkamis ovtta mánu.
Romssas ja Finnmárkkus vástidit 29 proseantta ahte sii leat árvvoštallan vilges mánu, dan botta go Trøndelágas leat 27 proseantta.
