Njealjis lohkásis juhket alkohola jus leat lossa dovddut ja hušša eallimis, čájeha ođđa guorahallan. – Dat sáhttá vearáskahttit dili, váruha Av-og-til organisašuvdna.
40 proseantta nuorra ollesolbmuin, geat leat gaskal 18-29 jagi boarrásat, leat juhkan alkohola jus leamaš lossamielas dahje váivvis.
Dat vuorjašuhttá Av-og-til organisašuvnna váldočálli Ragnhild Kaski go alkohola sáhttá addit dahje nanusmahttit psyhkalaš váttuid.
– Muhtimat oahcudit alkohola geažil, muhto váivves dovddut jávket dušše oanehis boddui. Guhkit áigge badjel sáhttá alkohola šaddat váralaš medisiidnan psyhkalaš váttuid vuostá ja dilli sáhttá vearáskit, dadjá son preassadieđáhusas.
Guorahallan
Ipsos lea čađahan álbmotguorahallama Av-og-til ovddas ja dat čájeha ahte njealjis lohkásis, geat leat gaskal 18-29 jagi boarrásat. leat juhkan alkohola váidudan dihte persovnnalaš váttisvuođaid, unnidit huša ja danin go leat lossamielas dahje váivvis.
– Logut mat guoskkahit nuoraid leat duppal geardde badjelis go muđui ja dat vuorjašuhttá. Mii diehtit ahte olu nuorat vásihit psyhkalaš hástalusaid, muhto mii fertet váruhit alkohola geavaheamis go dat ii čoavdde váttisvuođaid, lohká Kaski.
Ipsos čađahii guorahallama 2023 ođđajagemánus njukčamánnui. 2668 olbmo, badjel 18 jagi boarrásat, serve iskkadeapmái.
