Riddu Riđđu eamiálbmotfestivála lea oaidnimis ollu prográmmaosiin TIFF:s.
– Ollu jagiid ovttasbargu gaskal Riddu Riđđu Festivála ja Romssa riikkaidgaskasaš filbmafestivála (TIFF) joatká go TIFF ravgejuvvo johtui ođđajagemánu 16.–21.beivviid.
Riddu Riđu festiválahoavda Sajje Solbakk čállá preassadieđáhusas ahte Eurohpá stuorimus eamiálbmotfestivála lea oaidnimis ollu prográmmaosiin TIFF:s, nu go rahpanseremoniijas, lávdeságastallamis eamiálbmogiid ja populárakultuvrra birra ja loahpahanriemuin.
Ollu eamiálbmotfáttat
Filbmafestivála prográmma álgá rahpanseremoniijain ođđajagemánu 16. b , Mari Boine konsearttain, mii lea rabas buohkaide. Rahpanfilbma seamma eahkeda lea ođđa filbma «Ellos eatnu – La elva leve».
Son maiddái geassá ovdan lávdeságastallan: «Urfolk og populærkultur – mellom kamp og kunst», mii lea ođđajagemánu 18. beaivvi Romssa girjerádjosis.
– Dán jagi TIFF prográmma čájeha ollu filmmaid mat bohtet davviguovllu eamiálbmotservodagain ja mat leat daid birra. Čalmmustahttet ollu iešguđetlágán fáttáid ja bohtet ollu iešguđetlágán báikkiin. Filmmat leat oassin stuorát tendeanssas eamiálbmogiid kultuvrralaš dovddastemiin. Dán ságastallamis áigot lávdeoasseváldit digaštallat eamiálbmogiid ja populearakultuvrra, identitehta, dehálašvuođa gáibádusa, aktivismma ja oktavuođa eanetlohkoservodagain, čállá Riddu Riđđu preassadieđáhusas.
Ovttas TIFF:in bovdejit sii olbmuid dán jagi filbmafestivála loahpaheapmái «guoimmuhanbonanzai» Storgata campingas. Lávdde nalde leat A Million Pineapples, Kinsella, nonne, Tøndra, The Dodge Brothers ja lassin almmustahtto musihkalaš čiegusvuohta ovttasbarggus Rakettnatt festiválain.
Illuda eamiálbmotfilmmaide
Riddu Riđu festiválajođiheaddji Sajje Solbakk čállá ahte son lea gearggus vahkkui mas ollu dáhpáhuvvá.
– Riddu Riđu ja TIFF ovttasbargu lea buktán ollu gelddolaš kultuvrralaš vásáhusaid. Dán jagi prográmma iige spiehkas das ja mun illudan go oainnán dađistaga eanet sámi ja eará eamiálbmot filbmaprošeavttaid kinoliinnis. Persovnnalaččat illudan erenoamáš ollu oassálastit lávdeságastallamis eamiálbmogiid ja populearakultuvrra birra. Dat šaddá gelddolaš ja dehálaš ságastallan, čállá son.
Olles prográmma ja filbmafestivála bileahttavuovdin lea gávdnamis TIFF.no siiddus.
