Sámedikki rahčamuš oahpponeavvuid ovdánahttimis ja doarjjaortnega geahčadeapmi lea buktán bohtosiid.
– Illudahttá oaidnit guovtti olahusjagi bohtosiid. Eai leat ovdal leamaš dákkár bohtosat ja dan sáhttit ávvudit, muhto dárbbašit ain eanet oahpponeavvuid, lohká sámediggeráđđi Mikkel Eskil Mikkelsen (NSR) preassadieđáhusas.
Jagi 2019:s gárvvistuvvo 66 sámi oahpponeavvu, ja 2021:s fas 47 sámi oahpponeavvu.
Digitála oahpponeavvuid lassáneapmi
Eanet digitála oahpaheapmi ja eanet oahppit geat ožžot gáiddusoahpaheami sámegillii, dárbbašit lasi sámi digitála oahponeavvuid.
– Sámediggi lea dusten digitála skuvlaárgabeaivvi áŋgiruššamiin digitála oahpponeavvuide. Lea čielga politihkalaš vuoruheapmi guovtti sámediggeáigodaga leamaš, ja dál oaidnit vuosttaš bohtosiid. Ii dárbbaš eahpidit ge ahte dása ii leat dárbu.
Dat vuhttui hui čielgasit go skuvllat galge heivehallat oahpahusa koronadávdda áigge, dadjá Mikkel Eskil Mikkelsen.
Vuoruhemiid bohtosat leat čielgasat. 2021:s ledje 19 digitála oahpponeavvu 47 gárvvistuvvon oahpponeavvus, 2019:s ledje fas 25 ja 2018:s lei 1.
Dábálaš sámi oahponeavvuid statistihkka:
Jahki Dábálaš Deaddiluvvon Digitála
2015 26 23 3
2016 14 13 1
2017 38 37 1
2018 29 28 1
2019 66 41 25
2020 32 22 10
2021 47 28 19
Oktiibuot 252 193 60
Gáldu: Sámediggi
Gáibideaddji proseassa
Sámediggi lea čavgen oahpponeavvuid doarjjaortnega, earret eará loahpahan prošeavttaid mat eai gárvvistuvvo. Dát guoská erenoamážit boarrásat oahponeavvuide gitta 2011 rájes.
– Sámediggi lea eanet searaid bidjan oahpponeavvu hálddašeapmái ja obbalaččat geahčadan joatkevaš oahpponeavvoprošeavttaid. Lea leamaš gáibideaddji, muhto dárbbašlaš geassit ruovttoluotta ruđaid prošeavttain mat eai leat gárvvistuvvon ja loahpahit daid. – Lea dagahan dearvaset oahpponeavvobuvttadeami gos eanet prošeavttat gárvvistuvvojit dál. Boađusin leat guokte olahusjagi, dadjá Mikkelsen.
Doarjjaortnet evaluerejuvvui 2021:s
Sámediggi čađahii 2021:s evaluerema, mii čájehii sámi oahpponeavvoovdánahttimis hástalusaid. Seammás čájehii ahte oahpponeavvoovdánahttima doarjjaortnega hábmen ja hálddašeapmi doaibmá viehka bures.
– Váilot oahpponeavvočállit, muhto lean liikká ilus otná konklušuvnnain ahte hálddašeapmi lea buorre, ja juste dasa eai ávžžut stuorit rievdadusaid dál. Boađus orro duođaštuvvome go nákciimet olahit olahuslogu almmuhuvvon oahponeavvuiguin, vaikke oahpponeavvoovdánahttimis leat stuora hástalusat ain, lohká Mikkelsen.
Ain stuora hástalusat suorggis
Vaikke leat olahan olahusloguid sihke 2021:s ja 2019:s de leat stuora hástalusat suorggis. Mikkelsen dieđiha dievasčoahkkinášši boahttevaš oahpponeavvoovdánahttima birra.
– Mus leat ain mihttomearit oahpponeavvoovdánahttimii ja háliidan bidjat ovdan dievasčoahkkinášši gos eavttuhit eanet doaimmaid ovdánahttin dihte sámi oahpponeavvu ja -oahppanresurssaid, loahpaha Mikkelsen.
