Mediabearráigeahču iskan čájeha ahte golmmas njealji olbmos eai dieđe vissasit makkár govaid lea lohpi juohkit Facebook-siiddus.
Mediabearráigeahču iskama raporta čájeha ahte golmmas njealji olbmos, 76 proseantta, eai dieđe makkár njuolggadusat leat čadnon dahkkivuoigatvuhtii ja govvajuohkimii Facebook-siiddus, čájehit Mediabearráigeahču ođđa logut, čállá ođasdoaimmahat ntb.no.
– Suorggahahtti
Mediabearráigeahču direktevrra Mari Velsanda mielas lea suorggahahtti go nu olusiin ii leat máhttu dan birra.
– Go áigut almmuhit dahje juohkit govaid dahje filmma, de berret máhttit heaggadiehtolága ja vuoigŋaduodjelága. Dat máksá ahte jus leat váldán gova man háliidat almmuhit, de ferte jearrat dan olbmos gean leat govven, lea go ortnegis. Ovdal go almmuhat gova, de ferte maid jearrat govvejeaddjis dahje govvafitnodagas oažžu go lobi. Lea du ovddasvástádus árvvoštallat lea go ehtalaččat riekta juohkit govaid dahje filmmaid maid háliidat almmuhit, lohká Velsand ja lohká boarrásamos olbmuin lea unnimus máhttu dan ášši birra.
