Statistihkalaš guovddášdoaimmahaga (SSB) logut muitalit ahte loahpas 2023:s ledje Norggas 5 550 200 ássi. Olmmošlohku lássanii 61 219 olbmuin 2023:s.
Dát lea veahá unnit go 2022:s. Dalle olmmošlohku lassánii 63 700 olbmuin, ja lea leamaš stuorimus lassáneapmi maŋimuš logi jagis.
Stuora oassi diimmá olmmošlogu lassáneamis leat ukrainalaš báhtareaddjit, nuppi jagi maŋŋálaga. Oppalaččat bohte diibmá 86 600 báhtareaddji, man eanet eai leat leamašan eará go 2022:s.
Ukrainalaš stáhtaborgariid lohku Norggas lea guovtti jagis lassánan 3600 olbmos 65 800 olbmui.
– Dainna lágiin leat ukrainalaččat nubbin stuorimus sisafárrejeaddjejoavku riikkas, dadjá SSB seniora ráđđeaddi Magnus Haug.
Eanemus sisafárrejeaddji Norggas leat polskalaččat, 111 100 olbmo. Lietuvalaččat dahket goalmmádin stuorimus sisafárrejeaddjejoavkku, 48 900 olbmuin.
13,7 proseantta ukrainalaččat orrot Oslos ja Akerhusas, 15,4 proseantta ásset golmma davimus fylkkas. Muđui ásset 26,2 proseantta olles Norgga álbmogis Oslos ja Akerhusas ja Davvi-Norggas ges 8,7 proseantta álbmogis.
– Nu leat ukrainalaččat váikkuhan erenoamážit Davvi-Norgga olmmošlogu lassáneapmái. Maŋemus go sisafárrejeaddjit dagahedje stuorimus lassáneami Davvi-Norggas lei 1970:s Nordlánddas, 1986:s Finnmárkkus ja 2016:s Romssas, čállá SSB.
(NTB)
