Juohke njealját dievdu lea vuodján biillain vaikke lea juhkan alkohola ja juohke goalmmát norgalaš lea geavahan mátketelefovnna vuojedettiin. Dán čájeha ođđa raporta mii muitala norgalaččaid vuodjindábiid birra.
Norgga johtolagas dušše 118 olbmo diibmá, jápminlohku lassánii 38 olbmuin ovddit jagi ektui. Jápminlihkohisvuođat dáhpáhuvve iešguđetge sivaid geažil, muhto statistihkka čájeha ahte juohke goalmmát jápminlihkohisvuođas ii lean biilavuoddji doarvái áicil.
– Duođalaš johtolatlihkohisvuođat leat ain stuora servodatváttisvuohtan ja mii geat čohkkát stivrrana duohken sáhttit hehttet duođaleamos lihkohisvuođaid. Danin lea hirbmat váivi ja vuorjašuhtti ahte nu oallugat ain vudjet gárrenoaivvis dahje geavahit mátketelefovnna vuojedettiin, lohká Trygg Trafikk preassahoavda Christoffer Solstad Steen preassadieđáhusas.
Volvo Cars ja Trygg Trafikk leat maŋimuš jagiid čađahan álbmotguorahallama gávnnahandihte makkár vuodjindábit norgalaččain leat.
Bohtosat
35 proseantta biilavuddjiin muitalit ahte leat geavahan mátketelefovnna lobihemet go leat vuodján biillain. Gávccis lohkásis ges dadjet ahte leat oaidnán eará biilavuddjiid geavaheamen mátketelefovnna vuojedettiin.
– Mii ballat ahte eanet go 35 proseantta biilavuddjiin geavahit mátketelefovnna vuojedettiin go jo nu oallugat muitalit earáid oaidnán geavaheamen mátketelefovnna, lohká Volvo Cars Norgga gulahallanhoavda Erik Trosby.
Guorahallamis boahtá maid ovdan ahte masá bealli biilavuddjiin vásihit ahte dovddut ja miellaláhki váikkuha sin vuodjimii ja áicamii johtolagas. Dievdduid searvvis vástida juohke njealját ahte lea vuodján maŋŋel go lea juhkan alkohola ja 13 proseantta ges leat vuodján maŋŋel go leat geavahan eará gárrenmirkkuid. 40 proseantta dievdduin dadjet ahte leat masá ribahan nahkáriid vuojedettiin ja 13 proseantta muitala ahte leat ribahan nohkkat stivrrana duohkai.
– Go ná olu dievddut muitalit ahte leat vuodján gárrenoaivvis, leamašan váibasat dahje ribahan nahkáriid, de dat lea hirbmat vearrái. Dát eai oro áddemin man dehálaš lea konsentreret ja leat áicil go vuodjá biillain, lohká Trosby.
