-Almmuhus-
SMÁVVAOĐĐASATGuđas dušše mannan mánu johtolagas

Guđas dušše mannan mánu johtolagas

-

-

Logut lea diimmá rájes lassánan, go 2022 ođđajagemánus dušše guovttis johtolagas. Trygg Trafikk preassahoavda Christoffer Solstad Steen muitala ahte lea váivves álgu jahkái go nu alla duššanlogut leat.

Ledje vihtta dievddu ja okta nisu geat dušše mannan mánu. Viđas ledje vuodjime, ja okta ges lei vácci. Njeallje lihkohisvuođa dáhpáhuvve go persovdnabiillat ja guorbmebiillat beaškkehedje oktii.

– Dán jagis lea leamašan váivves álgu. Leat eanas biilavuoddjit geat leat duššan, ja ledje gaskal 18 ja 78 jagi boarrásat. Mii fertet álo buohkaid oažžut jurddašit makkár ovddasvástádus juohkehaččas lea johtolagas. Ii galgga olu geavvat ovdal go manná hejot, juohkehaš ferte alcces addit nu olu margiinnaid go vejolaš vuojidettiin, lohká Solstad Steen.

Leahtu heivehit siivui

Solstad Steen muitala ahte vuodjinsiivu rievdá jođánit miehtá riikka. Dalle gánnáha rievttes deahkaid atnit vuojidettiin, ja maiddái leahtu heivehit.

– Sáhttá gálja vaikko orru buorre siivu. Leahtu ferte heivehit siivui, ja gánnáha leat várrogas mohkiin. Biillaide, sihkkeliidda ja vázziide maid galgá buori gaskka doalahit.

Ii galgga vuodjit jus ii oainne

Trygg Trafikk ávžžuha muohttaga sihkkut biillas ja jieŋa faskut biilalásiin.

– Mii leat dađi bahábut dávjá oaidnán medias ahte vuoddjit eai daga dan. Dat lea biilavuoddji ovddasvástádus, ja sáhttá massit vuodjinkoartta dahje geavvat lihkohisvuhtii jus dan ii daga. Biillain ii galgga vuodjit jus ii oainne geainnu, lohká Solstad Steen.

-Almmuhus-