Dássážii leat 40 olbmo duššan johtolagas, dat lea njeallje eambbo go seamma áiggi diibmá.
Vássán jagi ledje surgadis logut johtolatsihkarvuođa ektui, go lei mearkkašahtti lassáneapmi jápminlihkohisvuođain ovddit jagiid ektui go lea leamaš njiedjan. Dađi bahábut leat dán rádjái dán jagi vel eambbo duššan johtolagas go diibmá.
– Dál álget geassemánut, ja dat áigodat go luottaid alde leat eanemus jápminlihkohisvuođat buohtastahttojuvvon muđui eará áigodagaiguin. Dat mearkkaša ahte mii geat vánddardit luottaid alde eat ábut viggat girddihit vaikko leat goike luottat. Dál lea dat áigodat go mii oaidnit eanemus duođalaš lihkohisvuođaid, earret eará go badjel luotta vudjet ja oktiibeaškkeheamit, dadjá Trygg Trafikk preassašeaffa, Christoffer Solstad Steen preassadieđáhusas.
Ii oktage sihkkelasti leat duššan dán jagi
Lassáneapmi lea leamaš biilavuddjiid ja vázziolbmuid gaskkas, muhto sihkkelastit eai leat duššan.
– Lea hui buorre go ii oktage leat duššan sihkkeliin dán jagi, seammás eat ábut vajálduhttit ahte dat lea johtolatjoavku geaid lihkohisvuođat eai váldo mielde almmolaš lihkohisvuođastatistihkaide. Bargu sihkkarastin dihte buriid ja sihkkaris luottaid sidjiide geat sihkkelastet ferte ain jotkkojuvvot dadjá Solstad Steen.
Politiijat dieđihit olu johtolatdárkkisteami geasset
Geaidnopolitiijat dieđihit ahte šaddet olu dárkkisteamit strategalaš báikkiin olles geasi. Trygg Trafikk lea ilus go geaidnopolitiijat dahket dan.
– Mii diehtit ahte johtolatdárkkisteapmi lea okta doaibmabijuin main lea stuorámus ávki eastadit lihkohisvuođaid johtolagas. Dađi bahábut orrot mii eambbo ballame massit vuodjinkoartta go massit heakka, dahje duššadit muhtuma johtolagas. Danne lea dehálaš ahte geaidnopolitiijat leat olgun ja ožžot eret daid várálepmosiid johtolagas, dadjá Solstad Steen.
