Norgga soalddáhat leat bovdjeuvvon hárjehallat Suomas «Ryske» hárjehallamis.
Norgga armeá lea bovdejuvvon oassálastit Suoma hárjehallamis. Lea Finnmárkku eanasuodjalus mii galgá doppe oassálastit. Maŋimuš vahkku suoidnemánus galleda danin muhtin kompaniija mii gullá Porsáŋggu bataljuvdnii Suoma Jeagárbrigáda Soađegilis, hárjehallat ovttasráđiid Suoma ja USA soalddáhiiguin, čállá Finnmárkku eanasuodjalus preassadieđáhusas.
Ulbmil oassálastimiin lea ovdánahttit Davviriikkaid militearaovttasbarggu buriin kránnjáin.
– Dan láhkai beassat mii hárjehallat ovttasbargat Suoma soahteveagain ja seammás nanusmahttit iežamet gaskavuođaid Suoma Jeagárbrigádain, lohká Finnmárkku eanasuodjalusa hoavda, Tomas Beck, ja lasiha:
– Finnmárkkus lea guhkes riikkarádjá Supmii ja eanet ovttasbargu attašii midjiide Finnmárkku eanasuodjalussii olu ovdamuniid, sihke operatiivvalaččat ja oahpahusa ja hárjehallama dáfus.
Diehtu hárjehallama birra:
Hárjehallan lea Rovajärvi (Heinuvaara) guovllus. Rovajärvi lea Oarje-Eurohpá stuorámus báhčin- ja hárjehallanbáiki. Hárjehallan galggašii buoridit soalddáhiid ovttasbarggu geat hárjehallet ja buoridit gaskavuođa. Lassin Porsáŋggu bataljuvnna kompaniijai, galget maid doppe leat Suoma ámmát ja bálvalusgeatnegasvuođa soalddáhat, ja US Army geahppa infanteriija dahje vázzi soalddáhat.
Diehtu Finnmárkku eanasuodjalus (FLF)
Go Finnmárkku eanasuodjalus ásahuvvui jođihanguovddážin Porsáŋggu bataljuvdnii, Mátta-Várjjat Garnisovnna Jeagárbataljuvdnii ja Finnmárkku ruovttusuodjalusa 17. guvlui, de nanusmahtii dat Norgga návcca čuoččuhit Norgga sorjjasmeahttunvuođa ja áidnavuoigatvuođa Finnmárkui. Finnmárkku eanasuodjalus galgá beavttálmahtti šielbmá eastadit soađi ja čalmmustahttit Norgga dáhtu ja attáldaga várjalit Finnmárkku. Finnmárkku eanasuodjalusa ásaheapmi heive dálá áiggiin ja áittagovain, ja veahkeha ráhkadit jáhkehahtti balddihangova man vuođđu lea NATO kollektiivvalaš suodjalus. Finnmárkku eanasuodjalus lea Iŋggášguolbanis máttabealde Leavnnja ja ásahuvvui 2018 čavčča. Tomas Beck jođiha Finnmárkku eanasuodjalusa.
Porsáŋggu bataljuvdna (POBN)
Porsáŋggu bataljuvdna lea ásahuvvon 2020 miessemánus ja lea Iŋggášguolbanis. Bataljuvnnas galgá earret eará leat nákca ja doaibmanákca vuosttaldit vearjjuiguin maiguin sáhttá guhkás ja deaivilit báhčit, sihke iežas vearjočehpiid bokte ja sensorvuogádagain. Bataljuvnnas 2022 giđa leat guokte kavaleriijaeskadronat (seamma go kompaniijat) ja bataljuvdnabargoveahka. Dađe mielde go resurssat šaddet olahanmuttus, de ceggejuvvo POBN cehkiid mielde ollesárvosaš bataljuvdnan ja ásahuvvo Finnmárkui ovdal 2025. Dát ossodat galgá mielde bisuheamen ráfi ja galgá čalmmustahttit Norgga dáhtu suodjalit Finnmárkku, go dalán sáhttá vuosttaldit vearjjuiguin. Bataljuvnna ovdamunni lea jođánit dustet áitaga, buorre nákca viežžat dieđu ja jođánit johtit. Oberstløytnánta Espen Stiberg jođiha bataljuvnna.
