-Almmuhus-
SMÁVVAOĐĐASATEanet militeara johtolat E6:s gaskkal Leavnnja ja Sis-Tromssa

Eanet militeara johtolat E6:s gaskkal Leavnnja ja Sis-Tromssa

-

-

Hárjehallat várjalit Finnmárkku lea maid oassi Norgga suodjalusas. Báhčinhárjehallan Thunder Bolt lea dál čađahuvvon ovttasráđiid Finnmárkku eanasuodjalusain. Dál máhccet ruovttoluotta Sis-Tromsii. 

– Finnmárkku soahtefápmu lea iešguđet ossodagaid ja doaibmannávccaid ovttasbarggu duohken. Dan olaha go  ovttasráđiid hárjehallá ja oahpásmuvvá. Mii leat hárjehallan vássán vahkkus áššáiguoskevaš doaibmabarggu bokte albma luođaiguin. Dát lea leamaš dehálaš mihttomearri Finnmárkku eanasuodjalusa ceggemis ja mii leat ožžon buorre vuođu davviguovllu viidásabbo suodjalannávcca nannemii, lohká Finnmárkku eanasuodjalusa hoavda, oberst Tomas Beck preassadieđáhusas. 

Dál galgá Sis-Tromssa artilleriija, pánsersuodjaluvvon vuojánat ja boagánvovnnat mat oassálaste, fas máhccat ruoktot Sis-Tromsii. Dál lea golbma ráidovuodjima jođus E6:s mielde duorastaga, geassemánu 16. beaivvi iđida rájes gitta bearjadaga  geassemánu 17. beaivvi ovdalgaskabeaivvi rádjái. Dasa lassin lea maid siviila laigojuvvon fievrredanfitnodagat mielde dán ráiddus. 

– Oažžut buori ovttasbarggu

Kent Dahl lea Trenregimeantta Logistikkbataljuvnna hoavda ja son muitala ahte dát ráidovuodjin gaskal Sis-Tromssa ja Finnmárkku lea sin ovddasvástádus.

– Dát leat buorre ovttasbargoarena. Mii leat geavahan brigáda Stridstrenbataljuvnna návccaid go jođiimet davás, lohká Kent Dahl.

Earret gálvofievrredeami, de lea Kent Dahl veahka maid fuolahan váráiduhttima Finnmárkku eanasuodjalusa vehkii mii iešalddis ii lean nu moalkái ja váttis. 

– Muhto lei olu heivehaddan. Seammás oažžut mii maid hirbmat buori ovttasbarggu daid veagaiguin masa mii fuolahat váráiduhttima. Jus dát veagat eai oaččo doarvái lattaid, boaldámuša, borramuša, gieddevuojándivohagaid, ovdamearkka dihtii, na de lea váttis sis čađahit iežaset soahtedoaimmaid, čilge Kent Dahl.

Mii lea Thunder Bolt? 

Thunder Bolt lea ovttasbargohárjehallan. Dákkára ovttasbargohárjehallan, dán vuoru armea, lea ahte iešguđet ossodagat hárjehallet heivehit artilleriija, bombabálkumiid, logistihka, sanitehta ja roasmmohuvvan soalddáhiid eváhkku barggu, vázzi soalddáhiid, pánsereastadeami, jeagárgirdiid, pánservuojániid geavaheami, doarjja girdimiid, helikopter geavaheami, Ruovttusuodjalusa soalddátveaga suodjaleami, ja nu ain, ovttasbarggu. Lea Finnmárkku eanasuodjaleami bargoveahka mii lea ráhkadan ja oktii heivehan dán hárjehallama. 630 soalddáha oassálaste. Ledje Finnmárkku eanasuodjalus, Brigade Nord, Ruovttusuodjalus, Trenregimeanta, Áibmosuodjalus, Suodjalusa sanitehta, Cybersuodjalus ja Suodjalusa logistihkkaorganisašuvdna.

-Almmuhus-