Mánnodaga, suoidnemánu 13. beaivvi, vánddardit Suodjalusa mohtorfievrrut Sis-Romssa ja Leavnjja gaskka. Dat mohtorvuojánat leat manname Porsáŋgui gos Suodjalus galgá hárjehallat luođđavearjjuiguin.
Mohtorvuojánat leat geaseheame militeara soahtevuojániid ja leat Ruovttusuodjalusa Claymore soalddáhat geat leat vuodjime. Leat guhtta ráiddu mat galget vuodjit daid gaskkaid ja juohke ráiddus leat birrasii logi mohtorfievrru maŋŋálaga.
Suodjalus lea geaseheame soahtevuojániid mat gullet Brigade Nordii Iŋggášguolbanii, ja fievrrut galget adnot «Thunder Bolt» hárjehallamis gos hárjehallet luođđavearjjuiguin.
Ruovttusuodjalusa bargu lea earret eará suodjalit militearalaš ovttadagaid. Fievrrideami oktavuođas adnojit soahtevuojánat mat gohčoduvvojit Multi III mat suddjejit Suodjalusveaga ráidojohtima. Vuodjin davás lea Suodjalusveaga ja Ruovttusuodjalusa ovttasbargu. Suodjalusveaga siskkáldas ovttodat Trenregimet jođiha logistihkkaoperašuvnna.
Hárjehallet luođđavearjjuiguin
Miehtá vahkku galgá Finnmárkku eanansuodjalus hárjehallat suodjalit riikkaoasi. Eanansuodjalus hárjehallá luođđavearjjuiguin.
– Dan oktavuođas mii johtit ollu E6 luotta mielde, eanemus Iŋggášguolbana ja Banak gaskka Leavnnjas, muhto maiddái Kárášjoga duottarguovllus, dieđiha Finnmárkku eanansuodjalusa hoavda, oberst Tomas Beck.
Preassabefála Arnfinn Sjøenden ávžžuha olbmuid geat leat guovllus leahkit várrogassan ja vuhtii váldit ahte militeara mohtorfievrrut ja ráidojohtimat mannet njoazibut go siviila johtolat.
– Mis lea stuora fokus sihkarvuhtii ja dahkat dieđusge dan maid sáhttit vai johtolat galgá mannat nu njuovžilit go vejolaš hárjehallanguovllus, dadjá Sjøenden preassadieđáhusas.
Sihke Romssas ja Finnmárkkus
Lea Suodjalusveahka mii jođiha Thunder Bolt 22 hárjehallama, oktan eará suodjalussurggiid oasseváldiiguin ja Suodjalusa lihtolaččaiguin. Hárjehallan dáhpáhuvvá sihke Romssas ja Finnmárkkus 22. ja 24. vahkku.
Hárjehallama váldoulbmil lea ovdánahttit ja hárjehallat Suodjalusveaga ovttasbarggu eará suodjalussurggiiguin.
