Go geavaha oapmebiilla dilálašvuođaraportta oapmebiillaoastima oktavuođas, de unnu riska mealgat, ja nissonolbmot leat buorit ovdamearkkat dan hárrái.
Álbmotiskan maid Norstat lea dahkan Forbrukerrådet (geavaheaddjeráđi) ovddas 2022 golgotmánus, čájeha ahte sihke oapmebiilla dilálašvuođaraporta ja soahpamuš leat dehálaččat dasa man duhtavaččat oastit leat.
– Nissonolbmot čállet dávjjibut oastinsoahpamuša ja ožžot dávjjibut mielde dilálašvuođaraportta. Nissonolbmot leat maid dávjjibut duhtavaččat iežaset oapmebiilaoastimiin, lohká Forbrukerrådet juridihkalaš seniorneavvu Thomas Iversen preassadieđáhusas.
Forbrukerrådet oažžu jahkásaččat 5 000 gažaldaga oapmebiilaoastima birra. Forbrukerrådet muitala ahte olu daid váttisvuođaid maid olbmot vásihit, livčče sáhttán garvit jus bealit livčče čállán soahpamuša ja dilálašvuođaraportta.
