48 proseantta dadjet ahte fuolaše bealleadnon juovlaskeaŋkkaid dán jagi. Dan čájeha Forbrukerrådet iskkadeapmi.
– Jus olmmoš oastá osiid dahje buot juovlaskeaŋkkaid oapmegávppiin, de seasttášii olu ruđaid. Gollolassáneami geažil rahčet oallugat ekonomalaččat, ja danin sáhttá gánnáhahtti oastit muhtin ráje bealleadnon juovlaskeaŋkkaid, lohká Forbrukerrådet direktevra Inger Lise Blyverket.
Forbrukerrådet bargá dan nammii ahte ekonomiija jorašii birra ja ahte olbmot geavahivččii ja bálkestivččii unnit dávviriid. Bealleadnon juovlaskeaŋkkat nanneše dan áigumuša.
– Jus ii oastte áibbas ođđa dávviriid, de seastá sihke ruđa ja birrasa, lohká Blyverket.
Studeanttaid juovlaskeaŋkkat
Iskkadeamis, man YouGov lea dahkan Forbrukerrådet ovddas, čájeha ahte studeanttat, skuvlaoahppit ja bargohárjehallit leat erenomáš positiivvat bealleadnon juovlaskeaŋkkaide.
41 proseantta dadjet ahte háliidivčče skeŋket bealleadnon juovlaskeaŋkkaid ja olles 68 proseantta dadjet ahte sávaše bealleadnon juovlaskeaŋkkaid.
Oktiibuot vástidit 31 proseantta norgalaččain ahte eai háliidivčče oastit bealleadnon juovlaskeaŋkkaid.
Vuoigatvuođat
Blyverket jáhkká vel eambbosat livččii árvvoštallan oastit bealleadnon juovlaskeaŋkkaid jus dieđáše makkár vuoigatvuođat olbmuin leat dan ektui.
– Jus priváhta olbmuin gávppaša oapmegávpeportálaid bokte, nu go Tises dahje Finn.no:s, de lea váidináigemearri guokte jagi. Vuovdi ferte doallat šiehtadusaid ja gálvu man oastá galgá nu go lea lohpiduvvon ja vurdojuvvon, lohká son.
Dat mearkkaša ovdamearkka dihte ahte oasti sáhttá gáibidit ruđaid ruovttoluotta jus bealleadnon telefovnnain ii sáhte riŋget dahje jus suffás leat stuora fasttes mearkkat mat eai oidnon almmuhusa govain. Oasti sáhttá maid botket gávpešiehtadusa ja gáibidit ruđaid ruovttoluotta jus vuovdi ii doaimmat gálvvu doarvái jođánit oastái.
– Jus eambbosat dieđášii makkár vuoigatvuođat dasa leat čadnon, de jáhkán ahte guorahallama logut livččii vel badjelis bealleadnon juovlaskeaŋkkaid ektui, loahpaha Forbrukerrådet direktevra Inger Lise Blyverket. (©NTB)
