Ealáhus, politihkka, valáštallan, dearvvašvuohta ja gearggusvuohta leat áššit mat 2021:s geasuhedje lohkkiid eanemusat.
Nu boahtá ovdan Mediabearráigeahču ođđa raporttas.
– Dákkár áššit lea stuorámus oassi das maid neahttaáviissat gokčet. Dát leat servodatberošteaddji áššis, mii mielddisbuktá ahte mediat devdet iežaset demokráhtalaš rolla servodagas, čilge Mediabearráigeahču direktevra Mari Velsand preassadieđáhusas.
Seamma áššit sihke báikkálaččat ja nationála dásis
Olu áššiin sihke báikkálaččat ja nationála dásis leat olu seamma fáttát, čájeha Mediabearráigeahču guorahallan.
– Muhto mo gokčet áššiid, lea goitge iešguđetládje, dan dihte go báikkálaš- ja regionálaáviissat gokčet áššiid iežaset báikkiid siskkobealde, čilge Velsand.
Dievddut ja «elite-gáldut» eanemus oidnosis
Raporta čájeha makkár gáldogeavaheapmi mediain lea, ja vuođđun leat ođas- ja debáhttasáddagat NRK:s ja TV2:s 2020 jagis.
Logut čájehit ahte 61 proseantta gálduin leat dievddut, ja 39 proseantta gálduin leat nissonolbmot.
– Logut čájehit ahte lea ain vejolaš buoridit gáldogeavaheami, muitala Velsand.
Guorahallan čájeha maid ahte mediat dávjjit geavahit «elite-gálduid» ovdalii go «dábálaš olbmuid».
