-Almmuhus-
-Almmuhus-
SMÁVVAOĐĐASATMaŋŋá 22 jagi lea Kalaallit Nunaat fas mielde máilmmemeašttir­gilvvuin 

Maŋŋá 22 jagi lea Kalaallit Nunaat fas mielde máilmmemeašttir­gilvvuin 

-

-

Ruonáeatnama giehtaspábbanissonjoavku kvalifiserii mannan geasi gilvvuide. 

Skábmamánu 29. beaivvi álget gilvvut Stavangeris ja vuosttaš speallu lea Kalaallit Nunaata ja Norgga gaskkas. 

– Mii galgat deaivvadit Norgga vuosttaš spealus,  mii lea favorihta vuoitit  olles MM. Dat šaddá hástaleaddjin ja seammás hirbmat vásáhussan, dadjá Ruonáeatnama nissonjoavkku hárjeheaddji  Andres Friis KNR:i. 

Kalaallit Nunaat dahje Ruonáeanan lea oktii dássážii beassan máilmmemeašttirgilvvuide giehtaspáppas, 2001:s. Dalle joavku ii vuoitán ovttage spealu, ii ge ožžon ovtta ge čuoggá, nu  šattai maŋimužžan loahppatabeallas. 

– Oavdudahku illá lea vejolaš 

Dán háve Ruonáeatnama joavku galgá speallat Norgga, Nuortariikka ja Lulli-Korea vuostá. Áššedovdit leat ovttaoaivvilis ahte Kalaallit Nunaata nissoniin lea unnimus vejolašvuohta birget dan ge háve máilmmemeašttirgilvvuin. 

NTB čállá ahte áššedovdit leat ovttaoaivilis das ahte Norgga nieiddat vuitet vuosttaš spealu mii lea Kalaallit Nuunata vuostá stuorra moallaearuin «10-12 dahje 25 moalain». 

Kalaallit Nunaat Radio (KNR) valáštallama áššedovdi Noah Mølgaard ii báljo jáhke sin joavkku birget bures. 

– Mii galgat vuordit ahte dat lea eanet go váttis. Lea hirbmat váttis beare oažžut moala Norgga vuostá, lohká Mølgaard KNR:i spealu birra mainna álget máilmmemeašttirgilvvut diibmu 20.30 Stavangeris.

– Oavdudahku illá lea vejolaš, dadjá Mølgraad go árvoštallá Kalaallit Nunaat nissonjoavkku oažžut juobe ovtta čuoggá ge gilvvuin. 

-Almmuhus-