Kárášjohkalaš oahpaha iežas neabi vuodjit garra guoikkaid Kárášjoga siste, guovllus gosa eai nu máŋggas dán áigge šat jođe.
Kárášjohkalaš oahpaha iežas neabi vuodjit garra guoikkaid Kárášjoga siste, guovllus gosa eai nu máŋggas dán áigge šat jođe.
Dovdat joga ja vuodjit johkafatnasiin lea árbevirolaš máhttu ja dan ferte oahppat. Oscar Halfdan Næss mielas lea illudahtti go su neabis, Oscar Henrik Biti Næssas (20), lea beroštupmi oahppat.
Vahkku dassái vujiiga Kárášjoga siste gitta Ráiggebávttegoržái, guovlu gos eai nu máŋggas jođe, go šaddá fasttes guoikkaid ja goržžiid vuodjit.
– Lea luondu mii doalvu olbmo Kárášjoga sisa. Luossa lea dušše bonus jus dan oažžu, čaimmiha Haldan Næss ja rámida neabi guhte vuosttaš háve vujii earret eará Buksaluhččennjielu vulos ja bajás.
– Ii dieđusge oahpa ovttain tuvrrain, ferte máŋgii vuodjit. Oscar máhttá vuodjit johkafatnasiin, lea hui čeahppi. Ledjen áibbas oadjebas su mielde, go Oscar máhttá vuodjit fatnasiin, lohká Halfdan Næss.
Bajimusas oainnát filmma gos Halfdan oahpaha neabis fatnasiin goargŋut guoikkaid mielde.
(Ášši joatká gova vuolábealde, ođasmahte siiddu jus filmmat eai iđe dalán)
Govven: Inga Marie Guttorm
Erenomáš luondu
Son muitala vuodján mánnávuođas fatnasiin márkanbáikkis, muhto deattuha ahte ii sáhte buhttestahttit márkanvuodjima guoikavuodjimiin.
– Lean vuodján guoikkaid ovdal, muhto Buksaluhččennjielu in lean goassege ovdal vuodján, go dat lea áibbas eará. Mađe badjelis boađát Kárášjoga sisa, dađe eambbo geađgái ja báktái lea johka. Bávttit ja goržžit leat stuorrát. Ferte dat máhttu mii Halfdanis lea go áigu johtit doppe. Lean lihkolaš go oahpaha mu, lohká nuorra fanasvuoddji.
Son dovddasta ahte lei suohtas vuodjit Buksaluhččennjielu ja dovdui maid adrenaliidna.
Ávvir jearrá lei go balus.
– Mus ii lean áigi ballat, lei fokus čuovvut joga ja vuodjit, dadjá Oscar Biti Næss.
(Ášši joatká filmmaža vuolábealde)
Ii dolle vel gal okto
Oscar Biti Næss lohká fas háliidit vuodjit Buksaluhččennjielu ja Falesgoržži, muhto ii loga vel doarvái buori máhtu ja gelbbolašvuođa vuodjit okto.
– In vel gal dolle okto, jus nu sáhttá dadjat, muhto sávvamis goas nu dan dagan. Lea dehálaš ahte lea čeahpes ovdageažealmmái gii máhttá áicat joga, diehtá maid galgá bargat, lohká Oscar Henrik Biti Næss.
Son lasiha ahte lea sihke lihkolaš ja giitevaš go su eanu Oscar Halfdan Næss oahpaha iežas máhtu ja gelbbolašvuođa viidásat.
Dáidu beassat nu bajás
Oscar Henrik Biti Næss muitala iežas liikot johtit luonddus ja erenomážit jogas.
– Lea hui fiinnis olgun, liikon oaggut ja illudan olles jagi beassat johkii. Kárášjoga siste lea eará luondu go vuollin, leat bávttit ja stuorra goržžit. Eai buohkat máhte dahje arvva nu bajás vuodjit johkafatnasiin. Lea dáidu beassat dohko, lohká Oscar Biti Næss.
Dehálaš árbevierru
Oscar Biti Næss čilge su mielas lea Halfdan Næssa máhttu ja gelbbolašvuohta vuodjit johkafatnasiin ja dovdat joga dehálaš árbevierru oahppat.
– Halfdana máhttu lea dehálaš árbevierru. Mu áddjá, Oscar, ja buot mu ednuin leat dat. Eai buohkat máhte vuodjit ja lohkat joga. Dán áigge eai leat nu olusat geat vudjet fatnasiin garra guoikkaid, ii ge leat juohkehaš gii máhttá dan. Munnje lea dehálaš oahppat vuodjit Kárášjoga siste, lohká Oscar Bitit Næss.
(Ášši joatká filmmaža vuolábealde)
Váruha máhtu jávkat
Halfdan Næss mielas lea somá oahpahit neabi ja lasiha ahte iežas gánda, gii lea 9-jahkásaš, lea jo hárjehallagoahtán vuodjit fatnasiin.
Son váruha ge dološ johkaárbevieru jávkat jus ii váldde áiggi oahpahit boahttevaš buolvvaid.
Muhto deattuha ovttain tuvrrain ii oahpa, ferte máŋga tuvrra vuodjit.
– Ferte máŋgii vuodjit. Oahppat geahččat ja lohkat joga, ja go hárjána, de ii leat váralaš iige váttis vuodjit bajás. Ii galgga vuodjit sorbmái, oaidná čázis gokko ii sáhte vuodjit, ja dalle ferte geassit fatnasa. Moai Oscariin ean geassán, ja vujiime gitta bajás. Buksaluhččennjiellu veaháš čuoččastii, muhto lei dušše hearvái vai oaidná ahte ii leat beare vuodjit. Livččen sáhttán čuimmiin caggat, muhto sihten lássá beale vuodjit nu ahte fanas fas vulggii ja dan oidnen čázis, čilge Halfdan Næss sudno neabi tuvrra birra.
