Sámediggi lea juolludan 250 000 ruvdnosaš doarjaga Sandra Ringii Sievjjus, Álaheaju suohkanis, oastit guolástanfatnasa.
Sandra Ring oažžu Sámedikkis doarjaga bivdoneavvuide 33 000 ruvnno ovddas.
– Lea buorre go mii sáhttit doarjut guolásteami Sámis. Mun lean ilus go mii sáhttit veahkehit ođđa guolásteddjiid álgit ealáhusain ja erenoamážit nuorra nissonolbmuid. Min riddoguovlluin lea juohke ođđa guolásteaddji resursa man mii áinnas doarjut, dadjá sámediggepresideanta Silje Karine Muotka preassadieđáhusastis.
Doarjja lea juolluduvvon Sámedikki mariidnaealáhusaid doarjjaortnega bokte.
Ávvir lea geahččalan oažžot ságaide Sandra Ringa, muhto eat leat lihkostuvvan.
