Anette Helene Länsmana fitnodat A.H Länsman Fisk AS oažžu doarjaga Sámedikkis oastit bivdofatnasa.
Sámediggeráđđi lea juolludan 75 000 ruvdnosaš doarjaga A.H Länsman Fisk AS Unjárgga gielddas oastit bivdofatnasa.
Unjárgga gielda lea ealáhusovddideami doarjjadoaibmaguovllus, ja dan dihte lea vejolaš doarjut fitnodaga.
– Illudahttá sakka go rekrutteren guolástusaide lassána, ja erenoamážit illudahttá dat go nissonolbmot áigot bargat guolástemiin, dadjá sámediggepresideanta Silje Karine Muotka (NSR) preassadieđáhusastis.
Dehálaš doarjot
Sámediggepresideantta mielas lea deaŧalaš ahte Sámediggi doarju sin geat háliidit bargat guolástusealáhusas.
– Dán lágan áŋgiruššan sáhttá addit maiddái eará oalgeváikkuhusaid, nugo ovdamearkka dihtii leat mielde sihkkarastimin sámi ássama rittuin.
Háliidit eambbo guolásteddjiid
175 000 ruvdnosaš doarjja juolluduvvo doarjjaortnegis Doarjja vuođđoealáhusaide – mariidnaealáhusat.
– Sámediggi háliida ahte eambbogat barggašedje guolástusain, ja danne lea mis doarjjaortnet movttiidahttin dihtii oastit fatnasa vai eambbogat álggášedje riddolagaš bivdui, dadjá sámediggepresideanta.
Ávvir ii leat ožžon A.H Länsman Fisk AS fitnodateaiggáda Anette Helene Länsman ságaide.
