-Almmuhus-
VALÁŠTALLANGuovttegeardán historjjálaš 

Guovttegeardán historjjálaš 

-

-

Šifergeađgemedállja rattis, bajimusas vuoitopállas moddjádii Ole Henrik Isaksen Eira maiddái dán jagi.

Guovdageaidnulaš Ole Henrik Isaksen Eira lea historjjálaš, go lea vuosttaš juniorgilvvohalli gii lea vuoitán Finnmarksløpet beanagilvvuid guovtte geardde.

Son lei diibmá juo historjjálaš, go lei dalle nuoramus junior gii lea searvan gilvvuide obanassiige.

Mánnodaga, beaivvi maŋŋel go ollejedje mollii, juhke vuoittuid sierra doaluin moallabáikkis.

Ollu olbmot ledje boahtán ávvudit dan logi nuorra beanavuoddji geat ollejedje juniorluohkás.

 

Fuođđarat vuoitun

Váldovuoitu juniorgilvvuin lea ovtta jagi Apetitt beanaborramuš guđa beatnagii, mas lea 42 000 ruvnno árvu, ja dávvirat Axaedos 4 500 ruvdnui.

Nuppi sajis lei Álttá nieida Maria Jøraholmen oaččui beanafuođđariid 15 000 ruvnno ovddas ja goalmmát sajis ruoŧŧelaš Ronja Persson gii vuittiii fuođđarid 10 000 ruvnno ovddas. 

 


Rámis: Ole Henrika eadni Máret Ánna Eira lea gába bártniinis, gean lohká álo leamaš hui searran. 

 

Ilus go searvvai

Vuoitojuohkimis giitalii vuoiti Ole Henrik iežas beanavuodjinmentora ja gilvoveahki May Conny Johansena, gean luhtte son orru ja gean leat beatnagat. 

– Su haga in livčče mun dás. Lean hui ilus dál, ja ilus go mun vulgen dattetge gilvui, dajai Ole Henrik, gii ovdalaš dieđihanáiggi lei eahpidan galgá go searvat obage. 

Ole Henrik dajai juo go bođii mollii, ahte son ii searvva šat Finnmarksløpet gilvui ovdal go beassá 1200 km gilvalit.

Dál sus leat eará plánat.

Vuoittut rávisolbmuid gilvvuin leat ATV-vuojánat goabbat sturrodagas.


Measta aivve nieiddat: Dán ortnegis bohte mollii: 1. Ole Henrik Isaksen Eira, 2. Maria Jøraholmen, 3. Ronja Persson, 4. Klara Fjellborg, 5. David Aslaksen, 6. Ida Krempig, 6. Sunniva Tunheim, 8. Mariell Kristensen, 9. Helene Sørensen ja 10. Henriette Karlsen Brenna. Eirik Lindstad šattai geassádit gilvvus.

 

– Albma ambassedevrrat

Sátnejođiheaddji Monica Nielsen rámpui nuoraid.

– Mu mielas leat juniorvuoddjit nu čáffadat, lean čurvon daid ovddos buot jagiid. Lea buorre oaidnit sin ovdáneami, ahte dustet vuoddját beatnagiiguin dákkár hástalusaide. Lea maid somá oaidnit ahte máŋggas sis servet 500 ja 1200 km gilvvuide. Oaidnit dás ahte lea hirbmat buorre rektutteren beanagilvvuide.

 

Nielsen maid rámpo go nuorat arvet vuolgit dálvet vuodjit okto guhkes mátkkiide.

– Sis lea vuollegašvuohta dálvemáilbmái, dálkái ja lundui, ja leat earenoamáš čeahpit beatnagiiguin. Sii leat nu máilmme buorit ovddasteaddjit beanagilvvohallamiidda, dadjá son.

-Almmuhus-