-Almmuhus-
KULTUVRAKonsearta ja luossamálli liggii kárášjohkalaččaid

Konsearta ja luossamálli liggii kárášjohkalaččaid

-

-

Finnmarksløpet livescene lei Kárášjogas duorastaga, ja ollu olbmot ledje čoahkkanan geahččat konsearttaid ja vásihit Finnmarksløpet birrasa. Vaikko ii lean go moadde buolašceahki olgun, de šattai čoaskkis go áigi golai.

Eurohpá guhkimus beanavuodjima čuovvu maid musihkkalávdi ja lávdi olliige Kárášjohkii duorastaga, seammás go FL-1200 gilvvohallit ge ollegohte Kárášjohkii. 

Scene Finnmark lágida nuvttákonsearttaid mat jorret báikkis báikái Finnmárkkus, ja nu go Ávvir čálii duvle, de lea Tundra Electro mii lea váldoguoimmuheaddji.

 

Nuorra guoimmuheaddjit

Vaikko Tundra Electro galggai čuojahit, de ledje Kárášjoga báikkálaš nuorat geat rahpe guoimmuheami.

Lávddi ovddabeallái ledje hirbmat ollu olbmot čoahkkanan go Sárá Rávdná Anti, gii lei vuosttaš artista, lávlugođii lávlaga man ieš lea čállán. 

Nuoraid kulturdeaivvadeami nuorat lávlo moadde lávlaga ja loahpahedje vel Rolffa joavkku «Hjerteknuser» lávlagiin.

Dan lávlo Alfhild Beate Vuolab, Anna Corazon, Henriette Mielonen, Thea M. Somby ja Knut Erik Solbakken. 


Álggahii konsearttaid: Sárá Rávdná Anti álggahii konsearttaid ja čuojahii lávlaga man ieš lea čállán. Govven: Roy Arthur Olsen

 

Siida

Dan seammás go konsearttat jorret fylkkas, de čuovvu maid Finnmarksløpet siida beanavuodjimiid ja siiddas ledje ge Finnmarksløpet ovttasbargoguoimmit geat fálle sihke luossamáli, gilvvuid ja vuvde beatnatborramušaid. 


Balto: Go «Balto» guoimmuhii, de lei reaškkas sihke mánáid ja rávesolbmuid gaskkas. 
Govven: Roy Arthur Olsen

 

Liekkus miellaláhki

Sápmi Park olggobealde ledje ordnen vuohkkasit. Ledje ráhkadan golbma dollasaji, lávuid ceggon ja heivehan báikái, duljiid lebbon mánáide čohkkán sadjin ja obanassiige bargan hirbmat ollu vai galgá leat vuogas ja liekkus. 

– Kárášjohkii lea álo nu somá boahtit, go dáppe leat olbmot álo nu movttegat, dajai Geir Jakobsen Ávvirii go muitalii sin barggu birra báikkis. 


Liekkus: Dollasajiide ledje ollu olbmot čoahkkanan liekkadit ja geahččat go «Balto» lea lávddis.
Govven: Roy Arthur Olsen

 

Luossamálli

Norway Royal Salmon, Cermaq ja Grieg seafood guollefitnodagat leat okta oassi Finnmarksløpet siiddas, ja sii johtet miehtá fylkka ja fállet olbmuide nuvttá luossamáli.

Dan botta go Ávvir lea humadeamen singuin, de bođii okta báikkálaš almmái jearahit sis luossamáli birra. 

Almmái ii háliidan máistit máli go luossa, mii lei mális, bođii biebmanrusttegis. 

– Dat leat muhtimat geat leat kritihkalaččat ja háliidit muitalit midjiide sin jurdagiid min birra ja mii mis lea boastut. Muhto lihkus leat eatnasat hui positiivvat máistit ja liekkadit iežaset dearvvašlaš ja njálgga luosain, ja mii guossohit hirbmat ollu máli juohke eahkeda, dajai Jostein Iversen Grieg Seafood fitnodagas. 


Luossamálli: Guollebiebmanfitnodagat guossohedje fárrolaga luossamáli.  Cermaq fitnodaga Ronny Mortensen ja  Grieg Seafooda Jostein Iversen.
Govven: Roy Arthur Olsen

 

Tundra Electro

Go Tundra Electro joavku lávkii lávdái, de borgagođii. 

Tundra Electro joavkkus čuojaheaba Ingá-Máret Gaup-Juuso ja Patrick Shaw Iversen.

Gaup-Juuso juoigá sihke ođđa ja dološ luđiid ja musihkka maid čuojaheaba lea elektronika suorggis. 

Gaup-Juuso rámidii Kárášjoga liekkusvuođa ja dajai earenoamážin čuojahit go nu fiinna čoahkkaneapmi ja biras lea. 

– Mis lei albmá hástaleaddji álgu ja dat gal duođaid bijai leavttu munno turneai. Guovdageainnus, gos čuojaheimmet vuosttaš konseartta ja álggiimet turnea, lei oalle čoaskkis ja garra dálki, muđui gal lea mis leamaš hui fiinna dálki go leat mátkkoštallan, dajai juoigi. 


Tundra Electro: Ingá-Máret Gaup-Juuso ja Patrick Shaw Iversen leaba Tundra Electro joavku. Sudno čáppa šuoŋat čudje Sápmi Parkas duorastaga.​Govven: Roy Arthur Olsen

 

Ilus

Ingá-Máret Gaup-Juuso muitala iežaska hui ilusin go leaba ožžon vejolašvuođa johtit Finnmarksløpet livescene mielde miehtá Finnmárkku ja guoimmuhit.

Soai leaba beassan oahpásnuvvat sihke ođđa olbmuide ja ođđa guovlluide go leaba mátkkoštan.

– Mu mielas lea hui hávski beassat fitnat miehtá Finnmárkku ja oaidnit man viiddis dat duođaid lea. Mun lean nu hárve šaddat vánddardit Finnmárkkus ja mu mielas lea hui somá leamaš leat oassin dán dáhpáhusas, dadjá Gaup-Juuso. 

Tundra Electros leat plánejuvvon konsearttat ja sudnos leat maid eará prošeavttat jođus.

Boahtte čavčča galgá vuosttaš CD-skearru álmmuhuvvot.

– Mus lea dál fokus Tundra Electroi ja min bargguide. Mun lean jo ráhkkanišgoahtán nuppi skerrui luđiid ja oahpahallagoahtán sihke ođđa ja boares luđiid, mojohallá Ingá-Máret Gaup-Juuso.


Ollu olbmot: Earenoamážit go nuorat čuojahedje, de ledje ollu olbmot lávddi ovddabealde.Govven: Roy Arthur Olsen

 

Sátnejođiheaddji rámidii

Lávdde alde dajai Finnmarksløpet beaivválaš jođiheaddji, Svanhild Pedersen, ahte vaikko sii leat hárjánan ahte Kárášjogas leat 25 buolašceahki ja guovssahasat go sii ollejit deike, de gal ferte mieđihit ahte lei oba somá beassat vásihit njeallje buolašceahki Kárášjogas. 

Sátnejođiheaddji Svein Atle Somby maid lei lávdde alde Pederseniin fárrolaga, ja son muitalii ahte gielda lea rámis go leat olles njeallje bisánanbáikki Kárášjogas ja go olbmot leat nu viššalat doarjut Finnmarksløpet. 

– Mun gal čevllohalan go mis leat ná viššalis eaktodáhtolaš bargit ja čeahpes nuorat geaid mii aiddo oinniimet lávdde alde. Finnmarksløpet mearkkaša hui ollu olles min gildii ja dan oaidná maid das go ná ollu olbmot leat boahtán deike odne, dajai sátnejođiheaddji. 


Beaivválaš jođiheaddji: Finnmarksløpet beaivválaš jođiheaddji Svanhild Pedersen rámidii Kárášjoga.Govven: Roy Arthur Olsen 

 

«Balto» 

Duorastaga čájehuvvui «Balto» čájálmas golmma geardde, ja muhtin mánát gal gehčče čájálmasa unnimusat guktii.

«Balto» čájálmas lea guoimmuheapmi olles bearrašii ja leaba Alexander Rindestu ja Torje Åsali Jenssen geat neaktiba «Balto» ja «Torje».

Vaikko buot cukcasat eai lean dakkárat maid mánát ipmirdedje, de sii reške ja čuvvo bures mielde čájálmasas.

Ja go mánát eai reaškán, de han ledje váhnemat geat reaškkihedje. 

«Balto» lei ge son gii loahpahii Finnmarksløpet livescene Kárášjogas.

Go maŋemus čájálmas nogai, de guorranišgođii maid báiki olggobealde Sápmi Parka ja bargit álge čorget ja ráhkkanit vuolgit viidásit Áltái gos dán jagáš Finnmarksløpet livescene loahpahuvvo.

-Almmuhus-