Njukčamánu 26. beaivvi lea fas áigi bonjastit tiibmoviisára tiimmu ovddasguvlui, geasi guvlui.
Miehtá Eurohpá rievdadit dalle áiggi tiibmu 02.00:s tiibmu 03.00:i. Jus dus lea bargu, de fertet tiimma árabut vuolgit bargui, muhto eahketbeallái lea guhkit beaivečuovga.
Geasseáigi álgá maŋimuš sotnabeaivvi njukčamánus ja bistá čieža mánu, gitta maŋimuš sotnabeaivái golggotmánus. Dan mearridedje Norga ja EU-riikkat 1996:s. Norggas leamaš geasseáigi 1980:s rájes juohke jagi.
Norga čuovvu geasseáiggi áigesona mii lea Central European Summer Time (CEST) ja dálvit čuovvu Norga Central European Time (CET).
EU-parlameanta mearridii 2019:s heaittihit geasseáiggi, nu ahte miellahttoriikkat galge ieža mearridit čuvvot go bissovaš geasseáiggi vai bissovaš dálveáiggi. Áigumuša mielde galggai EU ja dan ovttasbargoriikkat, nu go Norga, heaitit rievdadeames áiggi jagi 2021:s. Muhto koronapandemiija geažil lea dat maŋiduvvon. Lea eahpečielggas goas dat dahkko. Diehtu dan birra gávdno eŋgelasgillii timeanddate.com. Leat 70 riikka miehtá máilmmi mat geavahit geasseáiggi. Eanaspáppa davimus guovllus geavahuvvo njukčamánu-skábmamánu áigodagas ja eanaspáppa máttimus guovllus ges čakčamánu-cuoŋománu áigodagas. Riikkat lagamus ekváhtora rievdadit hárve tiimmu geasseáigái go doppe ii rievdda beaivečuovgga guhkkodat nu olu jagis. Gáldu: timeanddate.no
