Sotnabeaivvi čuovganeapmái lea fas áigi botnjat tiibmoviissáriid ruovttoluotta dábálašáigái, dahje dálveáigái.
Njukčamánu rájes leamaš mis áigi UTC +2 tiimmu, muhto sotnabeaivvi, golggotmánu 30. beaivvi čuovganeapmái botnjat fas tiibmoviissáriid nu ahte čájehit UTC +1 tiimmu.
Justervesenet áigehoavdda Harald Hauglina váldobargu lea fuolahit ahte Norgga áigi álo čájeha rivttes áiggi UTC ektui. Son muitala ahte tiibmu mii čájeha dárkilis áiggi lea hirbmat dehálaš digitaliserejuvvon servodagas mii dárbbaša navigašuvnna ja digitála infrastruktuvrraid. Dattege áimmahuššá áigehoavda geasse- ja dálvveáiggi, amas vajálduhttit botnjat tiibmaviissáriid analoga tiimmus sotnabeaivvi čuovganeapmái dálveáigái.
– Lea 70 nationála áigelaboratoria birrasii 500 atomatiimmuid mihtidemiid vuođul ahte rehkenastet mii lea UTC dahje máilmmi áigi. Iešguđet riikkaid atomatiimmut dárkkistuvvojit beaivválaččat ja njeallje dakkár tiimmu lea Justervesenet ásahusa áigelaboratorias. Dát čájehit áiggi Norggas ja lea seammás ovttasráđiid buot máilmmi atomatiimmuiguin mielde rehkenastimin UTC, dieđihit Justervesenet preassadieđáhusas.
