– Mii evttohat seamma olu ruđa fylkkagielddaide go dan maid Stáhta geaidnodoaimmahat oaččui hálddašit fylkkageainnuid, ođđajagi 2020 álggus, lohká johtolatministtar Jon Georg Dale.
Mannan vahkus lasihii Johtolatdepartemeanta ruhtageavaheami 2020 stáhtabušehttii, dieđiha Johtolatdepartemeanta preassadieđáhusas. Ráđđehus sihkkarastá dáinna evttohusain ahte fylkkagielddat ožžot seamma olu ruđa go Stáhta geaidnodoaimmahat geavahii seamma bargui, go hálddašišgohtet fylkkageainnuid. Johtolatministtar Jon Georg Dale lohká sii evttohit maid addit fylkkagildii Stáhta geaidnodoaimmahaga rusttegiid.
– Sihke Stáhta geaidnodoaimmahat ja fylka leat čađaheamen stuorra nuppástuhttimiid. Gáibiduvvo olu bargiin. Dál biddjojit loahpalaš rámmat sadjái ja fargga sirdigohtet bargguid. Mus lea stuorra jáhkku ahte Stáhta geaidnodoaimmahat ja fylkkagielda ovttasráđiid gávdnet buoremus čovdosiid, lohká Dale.
